سفارش ایلیوب آلله، بیزه آتا _ آنانی
روا دگول بالا گوزدن بیر آن آتا، آنانی

قولاق وئر ای گوزلیم! بو گوزل روایته بیر
بو نوعی وصف ائلیوب ختم الانبیا آنانی

آنا ایاقی نین آلتیندادی بهشت برین
بو سرّه، یاخشی تانیر جنّت العُلی آنانی

آنا مقامینه حیران قالوب عقول فهول
ائدوبدی رتبه لی خلاّق کبریا آنانی

آنادی شیره ی جانین امیشدیروب بالییا
گرَک چوخ ایستیه جان مثلی هر بالا آنانی

او گوزلری یادا سال یاتمیوب سنه خاطر
ائدوبدی آغلاماقون درده مبتلا آنانی

او ال لری یادا سال ساخلیوب سنی گول تک
الونده ساخلا آماندی او باوفا آنانی

آنانین ادینه ال ویرما دستمازسیز سن
مقدّس ایلیوب آلله، بر ملا آنانی

اماندی قلبینی سیندیرما ائتمه دردین چوخ
محبّتیله ائله دردیوه دوا آنانی

آنا رضایتی آلله رضایتی ساییلوب
صداقتیله اوزوندن ائله رضا آنانی

ائوین صفاسی آنانین صفالی باخماقی دی
یاراتدی حقّ اوزی اوّلده با صفا آنانی

آنا گونونده فقط یوخ، همیشه یاد ایله
آدیله با ادب اُول ایلمه صدا آنانی

سنون یولوندا قویوبدور جوانلیق ایامین
یورانمادی نقدَر گلدی ابتلا، آنانی

بیر عدّه یه گوره آتما آنانی آغلاتما
قوجا چاغیندا چوخ اینجیتمه یورما، ها، آنانی

علی محبّتی قلبونده اولسا شکر ایله
به قول ختم رُسُل: چوخ ائله دعا آنانی

یواش یواش قلم ایستور چکه گریزه سوزی
اگر ئولوبدی، بو دم سالگیلان یادا آنانی

گوزومده اولدی مجسّم جوان ئولن بیر آنا
گلون بیر اوخشویاقون سینه سی یارا آنانی

وداع ائدنده کفن ایچره نعش زهرادن
بئله مخاطب ائدوب شاه کربلا آنانی:

دئدی آنا! ائلمه مبتلا فراقه منی
قاباقکی لار کیمی دور آلگیلان قوجاقه منی

منی گورنده گلوب شوقه دیلدن آغلاردون
محبّتیله آچوب قولاّرون قوجاقلاردون

سنون محبّتیوی اِنس و جانه بولدورّم
اگر قوجاقلاماسون من اوزیمی ئولدورّم

گلاب اشکیمی یوخ چاره نعشون اوسته سپم
ایاق طرفده اوتوردوم ایاقلاروندان ئوپم

چون الّی ایل صورا کرب وبلایه گلمه لی سن
شکسته نی کیمی اوردا نوایه گلمه لی سن

حسینووم قانا دوندی گوزومده گوزیاشیم
اَلیوی چک باشیما ال به ال گزر باشیم

علی دییر: قسم اولسون خدایه، گوردوم من
گلوب تحرّکه زهرا آچیلدی بند کفن

آلوب قوجاقه حسینی، جهانی آغلاتدی
آنا – بالا او زمان اِنس و جانی آغلاتدی

حسنده آغلادی، زینبده، امّ کلثومدا
او دمده گوش دیله ناگهان گلوب بو ندا

آنائیله – بالالار ایله کی قوجاقلاشدی
تزلزل ایلدی عرش و ملک لر آغلاشدی

آییر بالالاری قویما جهانی داغلیالار
روا دگول بو قدَر یانه یانه آغلیالار

الهی! سن گونی ماه منیره چوخ گورمه
آتا – آناسینی سیدبشیره چوخ گورمه