عرصه ی كربوبلاده يل ايمان گورونور
مظهر عشق و صفا آيت يزدان گورونور
قامتي سرو كيمين حيدر دوران گورونور
نوه ی حضرت زهرا مه تابان گورونور
وصفه عاجزدي ديليم يوسف كنعان گورونور
قاره گوزلريوزي آي همچو ملك منظريدي
نوه ی شير خدا صولتی چون حیدريدي
حامی جان به کف عترت پيغمبريدي
خَلقاَ و خُلقاَ ايله جّدينه دوز مظهريدي
كيم گوروب سسلدي آیینه ی یزدان گورونور
آدي اكبر الفي اكبره خاطر دانيشار
كافينه كرب وبلاده حقه خاطر چاليشار
باينه بنده دوشر نار شراره آليشار
راي آدي ره قرآنيده قانه قاريشار
آدينا كرب وبلا صحنه سي ميزان گورونور
پنجه بازوسي قوي حيدره مظهر دايانوب
نسبي پاك و منّزه دي مطهّر دايانوب
نچه مين لشكر خونخواره برابر دايانوب
دیه سن معرکه ی جنگیده حيدردايانوب
باخانون گوزلرينه ناطق قرآن گورونور
آچيلاندا دوداقي غافلي هشيار ايليور
خوش بيانيله ياتان لشكري بيدار ايليور
اوجا تكبيريله حق سوزلرون اظهار ايليور
قيدون راه خطادن ديور اخطار ايليور
عجباخصم دني جُمله سي نادان گورونور
من حسين ابن علي اوغليام هشياراولون
ال چكون جور وجفادن حقلین يار اولون
گيتميون باطله ساري بيزه غمخوار اولون
نه گولون ياپراقينا صدمه وران خوار اولون
گورون اوندا نجه حقدن سيزه احسان گورونور
دینه یاغی اولانون امرینی اجرا ایدیسوز
بو عمل لن اوزوزی دهریده رسوا ايديسوز
آنامون مهريه سين بيزلره حاشا ايديسوز
باغموسوز تشنه لره کفرده غوغا ايديسوز
گون شاخور ايستي هوا لبلري عطشان گورونور
آتشين صحبتي لشكر جانينا رعشه سالوب
ابن سعدون بو جوان طاقتيني َالدن آلوب
باخدي بيرصاق وصولاعرصه ده آواره قالوب
گوردي اطرافین آلوب لشگری خوفي آزالوب
واردي چون لشكري يوخ غصه سي شادان گورونور
امر ايدوب خدمتینه بكر دنی فوری گله
ويروب انگشتريني ائت ديدي جنگه عجله
قيلجيلن سپرين نيزه سيني آلدي اله
كبكبيلن اوزون آماده ايدوبدور جدله
گر چه مغروریدی اما گوزه ترسان گورونور
روبرو گلدي علي اكبره اُول شوم دغا
او ستم پيشه طلا بنده سي بو عبد خدا
او جفا معدني اما بو ُدر كنز وفا
او دني هرزه علف دور بو گول باغ ولا
روبرو جبهه آچوب كُفريلن ايمان گورونور
آچدي لعل لبيني شبه رسول مدنی
سيم و زر عشقينه گلدون دیدی ای شوم دني
نوه ی شیر خدایم تانی السّاعه منی
چکرم تیغ شرر باره بو میداندا سنی
سنيلن جنگ ايلمگ چوخ منه آسان گورونور
فرصتي آل الـه بو رزميده جدّيت ايله
رزمه آماده اُول اي بكر دني دقّت ايله
قدرتون وار نقدر لشكروه خدمت ايله
دم غنيمتدي چاليش حمله ده سن سبقت ايله
گوروم آيا قليجون ضربه سي هاردان گورونور
ردّ ايدوب نيزه ی بكري اوني ناكام ائلدی
ُطعمه سين دامه سالوب شيركيمين رام ائلدی
او پُر آوازه حريفي ايله آرام ائلدی
فرصتي آلموش اله بو سوزي اعلام ائلدی
ايلدريم تك قليجيمدان سنه نيران گورونور
بكري سالدي آريا نقطه پرگاركيمين
دولانوب دوره سينه گردش دّواركيمين
چرخشينده گونوزون ائتدي شب تاركيمين
َانديروبدور قليجين حیدر کرار كيمين
ايكي لشكر باخوري عرصه ده طوفان گورونور
حقه خاطرچاليشان حقّي نمايان ايلدي
ظلمي محو ايلدي حق نوريني تابان ايلدي
بیر قلیج وُردی اونی قانينه غلطان ايلدي
باشینی کسدی يري قانیله الوان ايلدي
قوم كافر باخوري صحنيه حيران گورونور
عرصه ني تنگ ايلوب دشمنه جولان ويروري
تلّيدن صاحب پرچم اونا فرمان ويروري
ولي باخ رحمه قاچان دشمنه امكان ويروري
گاه گاهی گيدوري تّله طرف سان ويروري
يعني اكبر هله ساليمدي ثناخوان گورونور
دولانور عرصه ني جولانگه ايدوب شيرژيان
توز ياتوب منظره اولدي هاميا اوندا عيان
گورديلر فاتح اولوب بکره او آزاده جوان
یوخ ایدن حالت کفاری او اثناده بیان
دشمنین گوزلرینه غیظیلی اصلان گورونور
قليجي اَلده دونور تلّه باخور يار حسين
درس جنگي اونا اورگتميش علمدار حسين
گوز تيكوب اكبره تل اوسته هوادار حسين
تلّيده شوقه گلوب دلبر و دلدار حسين
دست پرورده سی چون ضیغم ُغرّان گورونور
ايله شمشير ورور خيره قالوب لشكر شام
گوزده روشن گونوز اولموش سپه شامه چو شام
بيري سويلردي قوتاردي ايشيميز اولدي تمام
ايلدريم تك يره گويدن قليجون برقي مدام
َاندوگیجه دیئه سن آتش سوزان گورونور
قاچا قاچدور ولي بير گوشه ده شيطان دايانوب
ايستیور كامه چاتا مُنقذ نادان دايا نوب
قليجين آلموش اله مكريله پنهان دايا نوب
ائتدي بير ايش ديه سن گردش دوران دايانوب
گوزلره شبه نبی حالی پریشان گورونور
پارچالاندي باشي همچون شه خيبر يارالي
حيدرون ئوز نوه سي حيدره بنذر يارالي
سارالوب سولدي گول پاك پيمبر يارالي
میل ایدور ساق و صولا باش يارا پيكريارالي
يوخ تعادل دايانا تپراقا اُفتان گورونور
دوشدی آتدان يره سسلندي بابا داديمه گل
پيكريم ياره لي اعدا آرا امداديمه گل
باش يارا يوخدي توان دورماقا فرياديمه گل
ئولمميش سعي ايله سن مقتل وميعاديمه گل
گور نجه اوغلون علي قانينه غلطان گورونور
گلدی امدادينه سرعتلن او دم شاه زمن
آختاروب گوزلري تاپدي گوليني گول بجرن
ئوز ويروب اوندا اونا آيري غم و درد و محن
گوردی تپراقلارون اوستونده دوشوب قانلی دن
او قدر یارا دگوب پیکری شان شان گورونور
آلدی باشین دیزی اوسته دیدی دور ياتما اوغول
بو قوجالموش آتوي عرصه ده آغلاتما اوغول
بو آخان گوزياشيمي گوز يا شوا قاتما اوغول
آی سحر اولدوزوم آخما بئله تئز باتما اوغول
باخ پريشا نم و دشمن منه خندان گورونور
سني اخيامه نجه من آپاروم نازلي بالا
يارا اوستن يارا ورموش سنه بو قوم دغا
باش يارا سينه يارا ياره لره يوخدي دوا
باخدوقيجا ياروا يارون ايدور قلبي يارا
باشوون اوسته آتون زار و پريشان گورونور
اي آخوندي بو جوان اكبريمه آغلا مُدام
گوزسرشكين ئوزه مرجان كيمي دوز باغلا مُدام
بالا داغينده عزا ساخلا اورگ داغلا مُدام
بيرده استادوه هر يرده ادب ساخلا مُدام
قورخما محشرده سنه روضه رضوان گورونور
- سه شنبه
- 18
- آذر
- 1399
- ساعت
- 23:57
- نوشته شده توسط
- یوسف اکبری
- شاعر:
-
کربلایی حسن آخوندی
ارسال دیدگاه