كيم بو دار فانيه بئل باغلاسا ديوانه دي
هچكسه ائتموب وفا هركيم ديسه افسانه دي
دايما عشاقي وصلت عشقينه آغلار قويوب
گرچه گاهي گولدوروب گولدورماقي رندانه دي
نو عروسان تك بزنميش وار ادا و عشوه سي
گوزلري مكريله يكسر ساده دیل انسانه دي
آلادوب عالم بوئي نفسي ضعيف انسان لاري
كيم بلايه توش اولور مين لعنتي شيطانه دي
اودكيمين دوردار فاني عاشق اولسا كيم اونا
عاقبت محشرده جانی مونس نيرانه دي
ظاهري آلاتماقا زيبادي چوخدور عشوه سي
باطينيده چوخ قضايا وارگوزي هر يانه دي
بيرگوني طوي مجليسي بيرگون قوراربزم عزا
هرنه ايش وار چرخ بازيگرده مكارانه دي
هرقدمده هرنفس قورموش بيزه د ام بلا
عيش دنيايه اوزون ساتماز اوكي فرزا نه دي
بعضي انسانلاردا چوخدور انس و الفت عالمه
فكر ايدوللر زندگی دنیاده جاویدانه دي
بيلميولر بو جهان فتنه گرده يوخ وفا
هر گلن آخر گيدر دنيا مسافرخانه دي
سعي ايدون وجدانوزه مكريله لكه سالميا
اولماسا انساندا وجدان اوخشاري حيوانه دي
گر ويره قصرمجلل مكنت و جاه و مقام
ماترك تنها كفن هرسائل و سلطانه دي
ايليه لر قبريده اول نمازوندن سوال
يوخدي فرصت اوردامهلت بورداكي امكانه دي
محفل عرفانه گل روحون صفا تاپسون سنون
خوش اوشخصون حالينه عشقي اونون قرآنه دي
فرصت اولسا هرزمان يول سال او قبريستانلارا
باخ نجه انسانلارون منزل گهي ويرانه دي
گوئيا تپراقلار آتدا هرياتان سويلر بئله
قبريمز عاقل اولان انسانه عبرتخانه دي
قورخ اوساعتدن گلر پيك اجل ديداروه
جان آلارباخماز سرشگون بنذري القانه دي
قبره قويجاق تئز توكه لر اوستوه تپراقلاري
حشراولونجا بيرقرانلوق يرسنه كاشانه دي
تنگنا يردور او منزل خوفناك وپر مهيب
قبریدور آدی ولیکن بیر عدالت خانه دي
وار نئچه مامور حق سندن گلوب ایلر سوال
ائتدیگون اعمال او گون پاسخ گلن مهمانه دي
قبرون دوروبرينده چوخ ياتان وار حيف اولا
آشنايوخدوربيريندن جمله سي بيگانه دي
چيره اول تا وار نفس سنده هواي نفسوه
اولما ساكيم نفسه غالب لغزشي بيرآنه دي
نفسيدور انساني وادار ايلين هر بير ايشه
نفسه اولسا تابع هركيم منتسب شيطانه دي
اي كونول درس آل عليدن بوشلا فاني عالمي
كيم جهانه پشت پا ورسا ايشي مردانه دي
اوچ طلاقه ايليوبدور عالمي مولا علي
آري مومين لر فنا دنيائيلن بيگانه دي
خير عمل وار كيمده اولماز حشريده درد وغمي
اولماسا گرخوش عمل گوز ياشي يانه يانه دي
فانيدن عقبايه گل ياخشي عمل انبار ايله
سود سرشارين گوررسن حشريده جانانه دي
خير عمللردن ديوم ايندي بيرين جانا سنه
حضرت صادق سوزي مدرك گوزل عنوانه دي
ايتدي فرمايش حسينه آغلاسا كيم صدقيلن
حشريده بیلسون صراط اوستن یولی رضوانه دي
وقف مولا ايتميشم گونده نچه ساعاتيمي
نوكرون گونده گوزي مولا ايدن احسانه دي
دار دنياده گوزوم مولا حسينه آغليوب
حشريده بو گوز ياشيم ضامن دل نالانه دي
هر كيم استخداميدور حقين ويره لر آي باشي
بوغلام كمترون اجري ولي روزانه دي
اوتوز ائيلدن بالغ اولموش بو غلامون خدمتي
درگهینده ساخلیوب لطفي عجب شاهانه دي
اعتقاديم وار اوركدن فاطمه ديلبندينه
ير ئوزونده قبريده فخريم اولان ايمانه دي
قورخي حاشا ئوز ويره قبرايچره من تك نوكره
تا نمازيم گوز ياشيم واردي منه پروا نه دي
سهليدور قبر ايچره ايتمم واهمه محشر گوني
چون گوزوم زهرا بالا سيندا اولان احسانه دي
ايندي توك گوز ياشوي رخساره مولا عشقينه
حضرت زهراني ياد ايت آغلا سقا عشقينه
دوشدي آتدان كربلاده ياور رهبر يره
باش يارا حيدر کیمین نقش اولدی حيدر فر يره
ايتدي ديلدار فدا دار و ندارين شوقيلن
عشقينه خاطر دوشوب حيدر اوپن الّلر يره
اللراوسته قويدي بير گوز هديه ئوز ديلدارينه
بيرگوزونده اوخ يخيلدي حيدره بنذر يره
ادامه دارد
انتهای شعر
بیلسه آخوندي اگر قارداش غمين تاب ایلمز
آتشين صحبت ائدر آهي ورار آذر يره
فخر ائدور که شاعرم واردور الیمده دفتریم
بير گوني جان اوسته الّلردن دوشر دفتر يره
- چهارشنبه
- 19
- آذر
- 1399
- ساعت
- 0:16
- نوشته شده توسط
- یوسف اکبری
- شاعر:
-
کربلایی حسن آخوندی
ارسال دیدگاه