یارب یئر اوستی معرکه‌ی ظلم و زور اولوب
تبعید اولان یئر آلتینا علم و شعور اولوب
ایمان و دین سودا گورونن قرص ماه تک
فرهنگ نو پسنده ده نزدیک و دور اولوب
بو دوره ی جدید و زمانِ مدرنده
چوخلار آتیب محبتی چوخ قلب گور اولوب
چوخ نو نهال پیر طریقی بینمییور
چوخ نو رسیده چیخمیش ادبدن شرور اولوب
رحمت او نامداره که مندن قاباق دئدی
لعنت او طفله که آتاسیندان جسور اولوب
آیات فتح و فجر اوخونور سطح شهرده
شهرین ولی بیتیردیگی فسق و فجور اولوب
مظلوم او کس دگول که شقی‌لر قانین توکوب
مظلوم او شخصدور که فهیم و فکور اولوب
بیلمم زمان نه حاله قالیب هر گلن دئیور
ای صاحب زمانه زمان ظهور اولوب
وار هر نه سفره میزده فقط یوخدی بیر چراغ
بس که تمرد ایلموشوک قحط نور اولوب
گورمک اون اوزلی خلقی عذاب علیم دور
خوش حالینه او شخص شریفین که کور اولوب
چوخ گوز که اللی ایلده ایکی دفعه گولمئیب
چوخ قلب که چورک طلبینده تنور اولوب
چوخلار حسین دیینده یزید ائتمیش انبساط
چوخلار سجود ایدنده ائدیب اهرمن نشاط
- جمعه
- 21
- آذر
- 1399
- ساعت
- 23:31
- نوشته شده توسط
- یوسف اکبری
- شاعر:
-
عسگر شاهی اردبیلی
ارسال دیدگاه