مهرون حسین بو عالم امکانه ویرمرم
گنج گراندی قیمت ارزانه ویرمرم
دل جایگاه عشق حسیندور بو دلده من
بر ایسته سه محبّت بیگانه ویرمرم
ای پاک تربتی منه مهر نماز اولان
بو مُهر پاکی ملک سلیمانه ویرمرم
بوگوز یاشی که سندن اوتوردیده دن آخور
بیر دُرّدور که گوهر غلطانه ویرمرم
بو اشک شوره شربت شیرین جزاده وار
بی جا یره بو اشکیمی دامانه ویرمرم
ای سیّد شباب جنان سن یاتان یری
مین لر بهشت و روضۀ رضوانه ویرمرم
عطرون بهشت عطریدی روح بهشت سن
بو عطر پاکی نکهت ریحانه ویرمرم
ای کربلا صفاسی مزارون صفاسینی
سیر و صفای باغ و گلستانه ویرمرم
گر باغ کربلانی تاپام نغمه خوان اولام
هرگز مجال بلبل خوشخوانه ویرمرم
ایتسن منی قبول قاپوندا گدالیقا
بو افتخاری غزّت سلطانه ویرمرم
بیر قاره که غمونده سنون گیَّم اگنیمه
من بو قَرانی خلعت الوانه ویرمرم
بیرجرعه گرفرات سویوندان ایچم حسین
اول جرعه آبی چشمۀ حیوانه ویرمرم
نام حسین قویوب باشماتاج افتخار
بو امتیازی افسر شاهانه ویرمرم
دائم حسینیدن اولی عنوان صحبتیم
من بو بیانی سایر عنوانه ویرمرم
پایانه ویرّم عمریمی عشق حسینیله
عمریم گیدربوعشقیمی پایانه ویرمرم
من تابعم حسینه اوسلطان دین دیوب
بیعت الینی زادۀ سفیانه ویرمرم
من « تائبم » خدا ئوزی توفیق ایدر عطا
عمریمجه تن مطالب بُطلانه ویرمرم
- جمعه
- 21
- آذر
- 1399
- ساعت
- 23:42
- نوشته شده توسط
- یوسف اکبری
- شاعر:
-
صادق تائب
ارسال دیدگاه