ذکر ایله حسین آدینی هر درده دوادی
زیبا آدی تک تپراقیدا خاک شفادی
بیلمم بو حسینین آدینین حکمت و سرّین
هر دل بو آدی ذکر ائدوری غرق بکادی
آدم بو آدا آغلادی ،خاتمده ،ملکده
وار رازی بو حزنین اودی که سرّ خفادی
گر حبّ حسین اولماسا هر دلده،او گیلدی
گیلدنده او دل رتبه ده بی قدر و بهادی
نوح ائتدیگی اندازه بیری عمر ائده حتی
بی عشق حسین اولسا اونین عمری فنادی
هر دلده حسینه اولا گر مهر و ارادت
شک ائتمه طواف ایلگیلن کعبه اورادی
عشقیله وضو ایله دولان عالم عشقی
عشاقه فقط رمز بقا عشق ولادی
ورد ایله حسین آدینی آچ چشم بصیرت
باخ کرب و بلا دشتینه بزم عرفادی
ویزا و گذرنامه سیز اول قلبیده زائر
مین توسن عشق اوستینه تأخیر خطادی
اندوهیله ترسیم ائله دلده او دیاری
گوزیاشیله یاز دشت بلا رشگ سمادی
الله قانیدی چون وئرن اول دشته شرافت
افضلدی او یر کعبه دن ارزشده طلادی
بین الحرمین وصل ائدوری کعبه نی عرشه
تشبیهیمه باخ گور نه گوزلدور نه بجادی
عباس حرمی کعبه دی دورت گوشه سی واردی
شش گوشه مزاری آقامین عرش خدادی
وار حکمتی عباس مزاری دوشوب آیری
بو فاصله دلداده لره سعی و صفا دی
آند اولسون او گوداله آخان قرمزی قانه
دل کعبه سی عشق حاجیسینه کرب بلادی
مین کعبه دن افضلدی بو گودال طوافی
قربان اولوم اول قبره که حج فقرادی
گوزیاشیمی جاری ائلدی واژه ی گودال
تار اولدی گوزیمده گونوزیم لیل دجادی
گودالی ائدن وقتیده ذهنیمده تجسم
گوزیاشیم اگر قان اولا واللّهی سزادی
گودال نه گودالیدی ظاهرده چوخور یر
باطنده وفا مسلخیدور کوه منادی
یوخ ،کوه منادنده بو یر رتبه ده باشدی
اعظمدی ذبیحی بورانین فخر کسادی
توصیفینه الکندی دیلیم شرحینه عاجز
طوفانلیدی میقات بلا غملی فضادی
حلقومی کسه نیزه ائدوب خنجره سبقت
ذبح ائتگمه قربانلیقی ابزار جدادی
حنجردن اوپور نیزه اورک باشینی پیکان
سینه سوکولوبدی کورگ اوچ سمته یارادی
بیر اوخ که اورکدن دگوب هم چیخسا کورکدن
فواره لنوب قان سپیله عرشه روادی
مقتلده نمایان اولور آثار جنایت
گوداله باخان ذجّه چکور غرق نوادی
بیر یاندا یاتوب بیر یارالی قانین ایچینده
بیر سمتده قاتل دولانور فکری جفادی
طاهاده گلوب مقتله زهراده گلوبدی
حیدر ده حسن ده دیه سن حشر به پادی
بیر کیمسه دئمور شمره او ماواده کنار اول
بو جمع فقط انجمن آل عبادی
بسدور داخی ختم ایلگیلن مطلبی«زعفر»
بیر جمله ده یاز کرب و بلا کرب و بلادی
- جمعه
- 28
- آذر
- 1399
- ساعت
- 20:59
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه