قولاق وئر ای مرید آل عصمت
کتاب عشقیدن ایلورم روایت
دیوم بیر قصّه من ملک وفادن
حکایتدن ائدک اخذ هدایت
اشاره م بیر گل خوشبویه واردی
اوگلدن عطر آلور باغ طبیعت
اوگلدور گلشنی تکمیل ائدوبدی
وئروبدی گللره عطر و طراوت
همان گل خامس آل عبادور
کسا بزمی تاپوب اوندان جلالت
مقامینده فقط بسدور بو مطلب
اوشاقلیغدا ائدوب معراج اوحضرت
اوگون قنداقینی سلطان عشقین
گوی اهلی ایلدی گویده زیارت
اونی الله یاراتدی عشق کامل
اودور معنای عشق وسرخلقت
آدین الله اوزی تعیین ائدوبدی
حسیندور سومین نجم امامت
اونی خلق ایلمیشدی ،نورخالق
بشرشکلینده گلدی واردی حکمت
بواسرارین رموزی کشف اولونماز
خلایقده هانی کشفه اوقدرت
بواندازه بیله هرعارف انسان
اونون مقصودینه ایلر کفایت
اگر دنیا و مافیها یاراندی
اگر ارزان اولوب ارزاق نعمت
اگرهفت آسمان و کهکشاندا
تاپوب سیّارو ثابت نظم والفت
اگرتعیین اولوب خورشیده تابش
اگر سیرینده یوخ تاخیر و غفلت
اگرماه ایلیور گویلرده جلوه
اگرقویمور دوتا دنیانی ظلمت
اگر یئل لر وئرور اشجاره بهره
بولودلار یاغدیرور باران رحمت
بولار یمن شه گلگون کفندور
اولوب پیرایه ی زیبای خلقت
مرور ائتسون اگر یوم الستی
سوزین انشاسینه وار عمده آیت
هامی مخلوقینی ذرّ عالمینده
قوروب محفل خداوند ائتدی دعوت
رسول و انبیا و اولیادن
اومحفلده واریدی جمع کسرت
خدادن عاقل ونادانه یکسان
وئریلدی دیده ی فهم وبصیرت
ازل دیباچه ی تقدیر آچیلدی
اوطومار قضا اولدی روایت
بیلوب هرکس اوزی اوز سرنوشتین
ائدوب امضا اونی وئردی رضایت
چکیلدی پرده لر انوار اوجالدی
آپاردی دیده ی بینانی حیرت
اونورین لمعه سی بیر آن آزالدی
گوروندی گوزلره بیر لوح و رٱیت
صدا گلدی باخون مکتوب عشقه
ائدون انشاسینی لوحین قرائت
مجاهد شخص لازمدور بویوردی
قانیلان ایلسین دینه حمایت
حمایت مکتب و آئین حقدن
بوعلتدن تاپار حکم ضرورت
طریق کفریلن بیر دائم الخمر
بلاد حقّیده ایلر حکومت
شریعتده قویار اول فاسق انسان
قوای سیمیلن تاج خلافت
جلوس ایلر شریعت مسندینده
لباس دینیلن اول پست فطرت
قوای نفس ائلر عقلین احاطه
وجودین دولدورار طوفان نخوت
ائدر بازیچه شرع کبریانی
ائلر احکامیده تغییر سنّت
حریم حقّدن ایلر تجاوز
اشاعه ایلییر احکام بدعت
مباح ایلر حرامی، خمری مقدور
نماز و روزه نی بی قدر و قیمت
آچار یغما الین آیات حقه
تلاوتده ائدر احکامی سرقت
شکست حقّیدور تاپسا ادامه
سینار ارکان دین اولماز مرمّت
بوامره واجب و ملزومدور که
قویولسون پایه ی تضمین نصرت
اونصرتده بلا وار ابتلا وار
مصیبتدن اولار تٱمین اوفرصت
دوزر کیم عشقیلن بو ابتلایه
دئسون لبیک ائدک سودا بوساعت
ازل پیغمبران آلدی او لوحی
رسولان اولدولار مشتاق خدمت
وئرولدی ال اله عنوان اوخوندی
سالوبدی دللره مضمونی وحشت
اومیثاقین واریمش شرطی گویا
گرک همراه اولا صبر و دیانت
ازل شرطی بودورچیخسون وطندن
بلا صحراسینه ائتسون عزیمت
اوچولده محشر کبرا قورولسون
چالینسون ثانی ِ طبلِ قیامت
جماعت خارجی قویسونلا آدین
خروج عنوانیده وورسونلا تهمت
سو یولارین اونا سدّ ایلسونلر
سوسوزدان سینه سین آلسون حرارت
صف عشّاقده انصاری ایچسون
طریقِ حقّده جام شهادت
عبا سالسون یره یغسون عبایه
رشیداوغلون اوزی گر اولساطاقت
اون اوچ یاشدا گوزل بیرنوجوانی
قارشسون تپراقا،وئرسون رضایت
سو اوسته قارداشی قولسوز یخیلسون
تراب اوسته سوسوز غرق جراحت
ال اوسته شیرخوار اوغلون گتورسون
ائده تا زهریلی پیکان اصابت
خیامون ترک ائدن وقته منایه
گوره قیزلارینی غرق ملالت
سوسوز قیزلار گرک اولسون او چولده
اسیر پنجه ی قوم عداوت
او یرده اهل بیتین ترک قیلسون
منایه ایلسون عشقیله هجرت
اوزی جان وئرمه میش اخیامی یانسون
گوزی باخسون قوپاندا شور غارت
آییرسونلار باشین تشنه قفادن
سویولسون نعشی اولسون هتک حرمت
یر اوسته پیکری قالسون کفن سیز
باشین سرنیزیه وورسون رعیّیت
باشی سرنيزده معراج ائدنده
دگنده داش ائده قرآن تلاوت
قیامین ایستسه پاینده قالسون
گرک تعیین اولا آیری غرامت
اونی تضمین ائدر بیر قاره پرچم
وبیرده ایستیر مافوق همت
اونین شرطی بودور مقبول اولونسا
ائدر تا یوم دین تضمین نهضت
قولیندا سلسله اهل و عیالی
پیاده ایلیه طّی مسافت
گرک بازار و شهری کوچه کوچه
دولانسون قیزلاری چکسونله خفّت
خرابه گوشه سین مٱوا ائدنده
عزیزان حرم چکسون ریاضت
دوام ایتسون باشی تشت طلاده
دگنده خیزران قصد جسارت
دوداقلارین اوپنده چوب کینه
گلایه ایتمسین دَگدیکجه ضربت
اسیرانی چکر بزم شرابه
عداوت قصدینه قوم شقاوت
گلرلر عترتی قول باغلی خسته
او یرده دشمنی ایلر اهانت
او مجلسده نصارا بیر اسیری
تقاضا ایلییر وئرسونله کلفت
اودم لازمدی بیرشخص مدافع
اونا مخصوص اولا امرنیابت
مدافع ایلییرچون نطق وگفتار
گرک اولسون بلیغ و با فصاحت
اونون لحن کلام و رعب نطقی
او مجلسدن ائده سلب ابهّت
ذکور اولسا اوکس چون ئولدورللر
سزادی انتخاب اولسا بیر عورت
صف پیغمبران آلموشدی لوحی
باخانلار لا دئدی اولدی خجالت
سکوت محض اولدی بزمه حاکم
ائدردی هرکس اوزی عشقین ملامت
صداگلدی وئرون لوحی دولانسون
بومشکل امردور یوخدور مذمت
بونا پابند اولان شخص مجاهد
سزادی دللره ایتسون حکومت
وفا ایتسه اوکس میثاق عشقه
قویار روز جزا تاج شفاعت
غرض پیغمبران ردّ ائتدی لوحی
دولاندی ال به ال مکتوب حکمت
آلوبلار دفترِ قالو بلانی
ولىّ و اولیا ایتسونله رویت
نظاره ائتجگین هرکس او لوحه
ائدوردی مطلبه فکریله دقت
شرایط اولمویان شخصه مساعد
چیخوب صفدن ائدوبدی بزمی خلوت
کنار اولدی تماماً اولیالر
رسولان خدا تک چکدی خجلت
ایاق اوسته دوروب بیرمرد جاهد
بیرالده لوح آلوب بیرالده رٱیت
آچوب دل ایلدی اعلان منم من
منای عشقیده قربان وحدت
منم جان بذل ائدوب جانانه قویمام
تاپا بیع الشّرا بازاری آفت
منم میعادگاه عشقه خاطر
منانی ترک ائدن باشینده هیئت
کیم ایدی باغلادی پیمان اوگونده
کیم ایدی ایلدی میثاقه جرٱت
اوکس کیمدور رسولان خدادن
که بیر لبیکه آلدی ارجحیّت
کیمه وئردی خدا ذرّ عالمینده
شفاعت نامه نی میثاقه اجرت
مگر غیر از حسین فرزند زهرا
کیم ایلر بوایشه اقدام و طاقت
بئله پیمانه لایق تک حسیندور
حسین ایلر بلاده استقامت
گئچرجاندان حسین اسلامی ساخلار
باتار قانه قالار قرآن سلامت
گئچرباشدان نمازاوسته لب عطشان
نماز و روزه نی ایلر ضمانت
بوواضح سوزدو که مهمان آدیلان
عراقه اهل کوفه ائتدی دعوت
ولی بیلمم ندن قتلین قوناقی
فریضه بیلدی اول قومِ بد عادت
نماز اوسته باشین کسدی قفادن
نماز اهلی اونون بی جرم علت
هوای سیم و زر باشدا عربلر
هجوم ائتدی ائده کسب غنیمت
حسینین جانی لبلرده باخاردی
ائدنده خیمه سین اعراب غارت
بویرده " زعفرا " لرزاندی خامه
تاپورغارت سوزینده جسمی رعشت
هجوم لشگری اخیامه یازما
طریق صحبتی ایله رعایت
- جمعه
- 28
- آذر
- 1399
- ساعت
- 21:24
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه