تسلّی دور علی دلداره زلفون
یازور نسخه من بیماره زلفون
ائله حالت تاپوبدی قاره تللر
نماده اوخشیور گلزاره زلفون
قلجلار باشوه شانه ووروبدی
اولوبدی قرمزی بو قاره زلفون
خضاب ایتدون علی اعدا الیلن
ائدوبدی قلبیمی صد پاره زلفون
بدن یرده قالوب باشون جداده
ائدوبدی لیلینی آواره زلفون
عزا تیرین آتور نیزه باشیندان
کمان تک، عترت اطهاره زلفون
اسنده یل سوزور شبنم تلوندن
چمن تک نملیدور همواره زلفون
گئدوبدی گوزلرون چون خواب نازه
او دور سایه سالوب رخساره زلفون
منی دیندیرمه سون دیندیرمه اوغلوم
اسنده یل گلور گفتاره زلفون
آنان ئولسون باشوندا عمق زخمی
گتورمیش گور نجه اظهاره زلفون
تجلا ایلیور بدر جمالون
سالوبدی شعشعه دیواره زلفون
اسنده تللرون قلبیم چالیخلور
ائدوبدی قلبیمی گهواره زلفون
منی نالان قویوب سن کامه یتدون
وورور امضای غم طوماره زلفون
نه قدری عمر ائدم گولمم جهاندا
منی سالدی غم دشواره زلفون
گلنده خیمیه نعشون عباده
ووروبدی قلبیمه یوز یاره زلفون
دولاندیقجا باشون نیزه باشیندا
وئرور درس وفا احراره زلفون
اسنده یل اوخور لعنت دمادم
بو قوم ارذل و مکّاره زلفون
یازار«زعفر» کتاب سینه سینده
هامی ناچاره ایلر چاره زلفون
- جمعه
- 28
- آذر
- 1399
- ساعت
- 22:20
- نوشته شده توسط
- یوسف اکبری
- شاعر:
-
زعفر آزادمهر شیخ درآبادی
ارسال دیدگاه