به سبک(ای شاه مظلومان حسین...)
ای کربلا سلطانینه سقا ابوفاضل مدد
عطشان دوداقون نن خَجِل دریا ابوفاضل مدد
درگاهینه عالم غلام
مولا ابالفضله سلام ۲
دنیا سنه احسن دیر عقبا سنه احسن دیر
تل اوسته اللر سینه ده مولا سنه احسن دیر
آتدان دوشنده اوز ننون زهرا سنه احسن دیر
احسن سنه اوغلوم دئدی زهرا ابوفاضل مدد
درگاهینه عالم غلام
مولا ابالفضله سلام ۲
نهری آلیب سو ایچمدون عالم ائدیب رشک آغلادی
احوالیوه میدانیده گوز آغلادی اشک آغلادی
باخدی خجالت جانیوه سو آغلادی مشک آغلادی
سسلندی دریا الدخیل مولا ابوفاضل مدد
درگاهینه عالم غلام
مولا ابالفضله سلام ۲
بو رشته یِ عشقی آقا دشمن لرون هاردان کسر؟
کیم چپ باخا عشاقیوه نسلین شَهِ مردان کسر
تندن دوشن قوللاریوه عاشق لرون قربان کسر
حیران قالیب بو وحدته دنیا ابوفاضل مدد
درگاهینه عالم غلام
مولا ابالفضله سلام ۲
آتدان دوشنده سسلدون امدادیوه قارداشیوی
قوللار بدنده اولمادی گوزدن سیله گوزیاشیوی
گلدی حسین میدانیده آلدی قوجاقه باشیوی
سسلندی قربانون اولیم جان یا ابوفاضل مدد
درگاهینه عالم غلام
مولا ابالفضله سلام ۲
ای آلِ طاها یاوری عالم سنه قان آغلیار
اخیامده ایندی باجیم زینب پریشان آغلیار
سولمیش ربابین غنچه سی اصغر لب عطشان آغلیار
یاتما اولیب اخیامیده غوغا ابوفاضل مدد
درگاهینه عالم غلام
مولا ابالفضله سلام ۲
- جمعه
- 28
- آذر
- 1399
- ساعت
- 23:45
- نوشته شده توسط
- یوسف اکبری
- شاعر:
-
ابراهیم تون خوش قلم
ارسال دیدگاه