آنوون قامتی هجرونده کمان اولدی علی
نیزه دن لیلیه باخ گوزیاشی قان اولدی علی
زندگیده او قدر کی اوجالیقلان یاشادون
عاقبت باشوه دار اوستی مکان اولدی علی
بولدی خنجر سنون آلنوندا منیم طالعیمی
بختیمون گلشنی یاز وقتی خزان اولدی علی
نیزه گلدسته دی مخمور گوزون مئذنه دی
باشلا تکبیروی هنگام اذان اولدی علی
ایستدیم نوحه دیئم منده قلم قاشلاروا
اشکیمون جوهری رخساره روان اولدی علی
آغاران ساچ علنی ایلدی مجنونلوقیمی!!
گورنه اون سگیز ایلون سرّی عیان اولدی علی
گورسه حافظ بو اسن زلفوی حتما دیئجک:
نفس باد صبا مشک فشان اولدی علی
یوسفیم صورتوه باخماقا چوخ مشتری وار
عشق بازاری عجب پُر هیجان اولدی علی
بوردا تاجرلره بیجادی حسابیله کتاب
تللرون تک قاریشان، سود و زیان اولدی علی
غصه لرده قوجالوب کهنه له انسان کیمی کاش
هر قدمده بو جوان داغی جوان اولدی علی
هر زمان قصد ائلدیم ئوز گولومی ایگلمَگه
نیزه بان کسدی یولی قمچی تیکان اولدی علی
کیم دیئردی؟ منه حسرت اولاجاق قینانالیق
دوغرودان آرزیلاریم گور نه یالان اولدی علی
وطنی گور نچه مدتدی کی ترک ایلمیشوک
گَل گدک یثربه صغری نگران اولدی علی
- دوشنبه
- 1
- دی
- 1399
- ساعت
- 23:24
- نوشته شده توسط
- یوسف اکبری
- شاعر:
-
وفا منافی اردبیلی
ارسال دیدگاه