دور قارداش حسین السیز ایاقسیزلاری گتدیم
قارداشی ئولن قاره گین قیزلاری گتدیم
زنجیر اسارت قیریلوب ای شه ابرار
شاماتی گزوب زار گلوب عترت اطهار
اطرافون آلوب زلفی الینده بالا قزلار
یوز قویموش ایاق سمته نچه بیکس اوغولسوز
قبرون باشنا دور ووروب بیر فلک اولدوز
بیربیر دیرَم ایندی سنه شمر جفاسین
یوللاردا بیلرسن نه چکوب عترت یاسین
بو شرطیلن اوّل باشووین سن دی بلاسین
خولیله گیدوب کوفه ده که بیر گجه قالدون
آیا دی گوروم کوللرون اوسته نجه قالدون
بیزده او گجه سن کیمی توکدوک یوزه قانیاش
اولدوخ سو کنارینده ابوالفضلیله یولداش
وای قارداشیم ایستوردوم ایدم زمزمه قارداش
زهرا آنامون ناگه اوغول وای سسی گلدی
مظلوم حسین وای بالا وای ناله سی گلدی
زینب ئوله یاددان بو کراماتی چیخاتماز
سر نیزه ده ایتدون منی سن کوفه ده پیشواز
قرآن سسون ایتدی باجوی گرچه سرافراز
گورجک ولی افسرده اولان حالوی زینب
آز قالدی قویا عمّه سیز اطفالوی
سن نیزه ده زحمتله محلاتی دولاندون
یاندی ئورگیم سنگ جفادن یارالاندون
قرآن اوخودون خلق اویانا قانه بویاندون
گلدی ئورگیم درده بهانه اله سالدیم
عشق اهلی بیلر من نیه باش محمله چالدیم
بیز مجلس اغیاره اولان وقتیده داخل
چکمشدی بیزی بیر ایپه بو قوم اراذل
ایتمیشدیم عذاره آغاران زلفمی حایل
محمل یاراسندان باشیمون قانی آخاردی
زهرا قزینا دشمن اوتانمازدی باخاردی
گلمز دیله دل صاحبی قاتل یاراسندان
اولماز باجون آزرده او محمل یاراسندان
اما چتین عالمدی امان دیل یاراسندان
گوردونکه زیاد اوغلی منیله نه دانشدی
اشگیم دولانوب قانه حسین قلبیم آلشدی
گرچه من بی یاوره زندانیدی کوفه
کانون جفا معدن عدواندی کوفه
با اینهمه شاماتیدن آسانیدی کوفه
خوار ایتمدی هچ کوفه او اندازه عروسی
شام اهلی کنیز ایستدی بو تازه عروسی
شامون آدی گلدوقجه حسین بیر غمه یانام
بیر حادثه دور هر ندن آرتوق اونی سانّام
کشف ایتمگه گلمور یوزیم افسوس اوتانام
ظلم ایتدی نه اندازه دیمم آل امیّه
اما بو قدر بیل ئولوب الرده رقیه
آغوشنه آلدی بالوی نازیله تپراق
یوخ بلکه بیر عالم ادبی ایلدی دوستاق
بیر نسگلی ایتدی او قزون طاقتیمی طاق
واضح یتورردی منه اولسیدی نه دردی
بیر آجلیقین آهسته قولاقیمه دیَردی
گورجک تانیدی قانه باتان باشوی قارداش
آغوشه باسوب جان کیمی توکدی یوزه قانیاش
جان نقدینی ایتدی یارالی باشوه شاباش
بیر دفعه منی سسلدی سس گلمدی بیرده
بیر آه چکوب باتدی نفس گلمدی بیرده
عرشه یتوروب نوکرون ئوز شیون و دادین
شاها آلیشوب هجر اودی یاندیردی فؤادین
هر شعرده بیر دفعه یازار "منزوی " آدین
منظوری اودور تزتز ئوزین یادوه سالسون
بیر وقفه گلوب قبرووی آغوشنه آلسون
- جمعه
- 5
- دی
- 1399
- ساعت
- 23:27
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه