گل یا حسین که جنت و رضوان سنونکیدور
الان جوار رحمت منان سنونکیدور
ای نفس مطمئنه که مرزوق عند رب
سنسن که صدر محفل یاران سنونکیدور
الله یولیندا قان ویرن الله یانندادور
قرب جلال حضرت جانان سنونکیدور
مندن جدادی کیم سنی مندن جدا گوره
چون سر جان منیمدی سر و جان سنونکیدور
ذکر خفی دئ اینجیمسون تشنه لبلرون
ذکر جلی ثوابیده الان سنونکیدور
ربیم دیوب دوداقلاریوی ورما بیر بیره
اسماده هر بیری اولا آسان سنونکیدور
منان دیمه تلفظی مشکلدی لبلره
یا حافظیله ناصر و حنان سنونکیدور
اینجور سنان وران یارا قالخزما عرشه باش
دوندر بو عرشی فرشه که هر آن سنونکیدور
سن باخما عرشه من باخورام فرش ده سنه
قان ایچره بو شمایل لرزان سنونکیدور
ارنی دیینلره ئوزوی یاخشی ویر نشان
موسی یخان او پرتو تابان سنونکیدور
قاتل النده خنجره باخ گور جمالوی
ارنی دیمه که صورت خوبان سنونکیدور
ارنی دیمز جمال خدا ئوز جمالنه
وجه اللهی که پرده چکوب قان سنونکیدور
ویر هر کیمه ویرورسن ئوزون قول جنتی
حکم ایله اهل محشره دیوان سنونکیدور
سئچ بیر بیر آغلیانلاری گوندر بهشته سن
دیوان معدلت گونی فرمان سنونکیدور
بیر قطره آغلیان سنه مهماندی حشریده
مهمان سنوندی سفره احسان سنونکیدور
هر کیم قاچوب باشوندان ئولنلر اولاردیلار
سن زنده سن تمام شهیدان سنونکیدور
سن بیر اشاره مه که بو گون کچدون هر نه دن
من نیلیوم دیسونله که رجحان سنونکیدور؟
منده گرک قویام باشیوا تاج قدرتی
عالم گوره که قدرت یزدان سنونکیدور
زهرانی یولادیم آلا آغوشینه سنی
درد اهلینون گوزینده کی درمان سنونکیدور
زهرایه خوش صفا ایله چوخ دوشمه سجدیه
دیندیر گیلیلی گیتمیه مهمان سنونکیدور
زهرا آنون باخاندا یوزون قویما تپراقا
چک زلفوه دینن آنا بو قان سنونکیدور
قوی باغلاسون آنون ئوز الیلن او گوزلری
نه شمری گور نه زینبی هجران سنونکیدور
گر بو یولون مسافری سن باخما خیمیه
فکر ایتمه هئچ او غم زده طفلان سنونکیدور
حفظ ایلرم بو قورخلی اهل و عیالوی
هر یرده فضل و رحمت رحمان سنونکیدور
بیرده قزون رقییه سینونده ویرمه یر
آندیر اونی که منزل ویران سنونکیدور
خوشدور اوغول آتانون اولا قز آناسنون
بو قز ربابون اصغر عطشان سنونکیدور
زینبله سن السته بولوشدوز مصائبی
ویرانه زینبون بو بیابان سنونکیدور
من زینبی ئوزوم سنیلن شرکت ایلدیم
فخر ایله بو عقیله دوران سنونکیدور
زینب کیمی یاراتمامشام مهربان باجی
خوش حالوه که زینب نالان سنونکیدور
عباسون اولمیان گجه نین فکرین ایتمشم
نصفی یانان چادردا نگهبان سنونکیدور
تجلیل خاصیلن دوتارام بزم تعزیون
نوحه دیین او نوح خوش الحان سنونکیدور
حورانی قاره پوش ایلیوب یاسه یوللارام
خوار اولمیا که شام غريبان سنونکیدور
الان منیم یانیمدا سنون وار چوخ ارزشون
اجر و ثواب و فیض فراوان سنونکیدور
چون گوردی انبیاء هامی بو عهد نامه ده
امضایه شور و شوق فراوان سنونکیدور
ویردون ال اوسته صود امرون اوخ قباقینه
دنیانی یاندران قوزی قربان سنونکیدور
قرآنه قانون علت مبقیه دور حسین
سندن محال آیریلا قرآن سنونکیدور
قلبوندن اوخ چک آخ دیمه قانین دوت اوجوا
پیمانه نی بوشات که بو پیمان سنونکیدور
پیکان دگل چوخ اینجیمه بو پیک یاریدور
پیوند عشقه ناوک پران سنونکیدور
من ایستورم خلوصوه باخسون فرشته لر
مصداق انی اعلمه عنوان سنونکیدور
رد ایتمرم یانقلی اورکلر دعا سینی
ایله دعا که سینه سوزان سنونکیدور
سعی ایله باری وقت دعا فوته گیتمسین
هر نه دیسون سوز ایندی کماکان سنونکیدور
بو دورد آغاجدا سعی ایله هر گل اکورسن اک
هر نه گویرسه سرو و گلستان سنونکیدور
توفیق ایسته (منزوی) سن بعضی شاعره
بیلسون اوزون یازاندا بو دیوان سنونکیدور
- جمعه
- 5
- دی
- 1399
- ساعت
- 23:46
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه