بیر وقته گوزین اصغره شوریده سرآچدی
پیکانه باخوب شوره گلوب بال و پرآچدی
عاشق نه کی بیر کلمه قیلار عشق نمازین
دل آچمادی آندیردی اودا راز و نیازین
جانان اوخونی گوردی نشان ویردی بوغازین
تیر سه پره گورنجه نازک بوغاز آچدی
اوخ دوردی هوا اوسته دیدی آچ گوزون اصغر
مظلوم آتاوا ایندی ده وار هر سوزون اصغر
هاردان ئوپوم الساعه اوزون ویر نشان اصغر
سنلن منه بو فالی قضا و قدر آچدی
سوز یوخ هامی صید اولمالیدی مرگین الینده
بیر کاسه اجل زهری گلیر هرگون الینده
پیکان بویادی قانه هلالی گون الینده
دیسکیندی گوزل گوزلرین اول خوش سیر آچدی
گولدی او بالا گردش ایام زمانه
دل آچمادی آندیردی سوزین اهل جهانه
چکدی اوخی مظلوم آتا آتدی یانه یانه
دل حمد وثنایه او شه خون جگرآچدی
قانی سپوب افلاکه دیدی ساخلا امانت
محشر گونی بوقان ایدجاق یاخشی شفاعت
هر یرده عزاداریمه بو قاندی ضمانت
جنت قاپسون شیعمه بو صود امر آچدی
دنیاده قوی دشمنی سرکوب الدیم من
ظلمون ایوینی یکسره مخروب الدیم من
غالب اوزومم دشمنی مغلوب الدیم من
اصغر منه خوش پرچم فتح وظفر آچدی
یوز خیملره قویدی ولی چوخ اوتانوردی
علت اوییدی گاه گیدیب گه دایانوردی
خیمه دالیسندا ایله آغلوردی یانوردی
ناله سسی غم صحبتینی مختصرآچدی
شاهی حرم اهلی تانیدی آغلاماقیندان
قیزلار باجیلار چیخدی اودم غم اتاقیندان
گوردولر اومظلومون آخور قان دوداقیندان
اولده سوزی زینب ولا گوهر آچدی
عرض ایتدی حسین دینمویور اوغلون قوجاقیندا
سولدوردلار اولما گلوی اوز بوداقیندا
کول باشمه قارداش بونه قاندور دوداقیندا
اخر گئجون اخر سنه خونین سحر آچدی
قیزلار هامیدان چوخ الیدی شیون وناله
ووردولار اوآی پارچاسینون دورینه هاله
قویدیلا سارلمیش یوزی اول قانی دوداقه
دیل وای علی وای ذکرینه هر نوحه گرآچدی
بعضیسی دیور اوغلی ئولن ماتمه گلسون
بعضیسی دیور اولمویوب چاغرون عمه مه گلسون
بعضیسی دیور یاره ن علی سینمه گلسون
آخر بونه اوخویدی بوقدر یاروی آچدی
کیم آلدی باسوب باغرینا الدن اله ویریدی
بوطفله عجب سودیدیلر حرمله ویردی
ساچلارینی یولدی بالا قیزلار یله ویردی
قانلی بلگی قویدی یره عمه لر آچدی
قنداقی اولوب داغ جگر آل ترابه
بیر بوش بشیگه قویدولا گتدیله ربابه
قانلی بلک اولدی ایله نسگل اوجنابه
بیر عمر دیگولر،،گجه بوکدی،،سحرآچدی
طبعونده سنون(منزوی)وار ذوق ولطافت
هریرده اوخوندوقجا ایدر جلب محبت
من باب مثل فوری دیر اهل فصاحت
بوقافله مصریدی بار شکر آچدی
- شنبه
- 6
- دی
- 1399
- ساعت
- 19:22
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه