بیر آز دایان گئتمه بیله ای خامس اهل کسا
زینب دولانسون باشیوه ای یادگار مصطفا
ایوای یارالی قارداشیم
باشی بلالی قارداشیم (۲)
من گوز آچاندان عالمه غملر منه همدم اولوب
جدیم ئولندن اوخشیوب زینب فقط زلفون یولوب
بیر گون اتام حیدر ئولوب بیر گون آنام گل تک سولوب
جرمیم ندی اولموش ائشیم دنیا بویی داد و نوا
سن کی بولورسن قاره می جدیم ئولنده باغلادیم
حیدر غمینده گوزیاشین توکدوم عذاره آغلادیم
قارداشمیه ایوای دئدیم زهرایه سینه داغلادیم
سن ئولممیش اما باجون باشه سالوب قارداش قرا
هیچ باجینون کاشانه سین قارداش وداعی یخمیوب
هیچ بیر مسافر آیریلوب ائودن سنون تک چخمیوب
عمرومده هیچ غم قلبیمی بو آیریلیق تک سخمیوب
جدیم ،آتام ،زهرا و یا حتی وداع مجتبا
هیچ بینوانی من کیمی گوزدن زمانه سالمیوب
هیچ آیریلیق الدن بئله صبر و قراری آلمیوب
سنده گئدورسن زینبون بیر دادخواهی قالمیوب
سنسیز بو چولده نیلیوم ای ماسواللهه رجا
تا اگنیوه گیدون حسین زهرا وئرن پیراهنی
سالدون خیال و غصّیه آند اولسون آللهه منی
بولمَم نه بولدی قیزلارون ، اوج ائتدی عرشه شیونی
فریاد و واویلائیلن دولدی بو دشت نینوا
باخ گور نجه قیزلار یانور آغلور دییور ایوای بابا
باخ بیر ربابه خیمده گزلینجه ایلور آه و وا
مخیمده لیلانون ایشی اولموش بالام ایوای بالا
گل بو وداعی گورمه سن قیزلاریوه قارداش روا
باخ گور نجه سالموش وداعون مخیم ایچره اضطراب
باخ گور نجه قلبیمده وار بو آیریلیقدا التهاب
میدانه یالقیز گئتماقون قارداش منی ایلور کباب
گل بیر بوغازوندان ئوپوم زینب سنه اولسون فدا
لطف ایله بیرده خیممه باش چک سنی زهرا جانی
باشونده کی اُول یاره نی تا باغلیوم دورسون قانی
قارداش کی یوخدور ، زینبون آیا دئمزلر بس هانی؟
تا ایلییدی باشیوین بیر نحویلن دردین دوا
- شنبه
- 6
- دی
- 1399
- ساعت
- 19:45
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه