بو گئجه وار خرابه نون آیری هواسی عمه جان
دور ایاقا بو منزلون گلدی صفاسی عمه جان
لطف ایلیوب قوناق گلوب عمه بابام بو منزله
باش چڪه باغبان ڪیمی ڪنج خرابه ده گله
گور نه ایشیق سالوب باشی بو گئجه غملی محفله
هانسی گونون اولار بئله نور و ضیاسی عمه جان
شڪر ایلیرم زیارتین حق منه نائل ایلیوب
لطف و عنایتین منیم حالیمه شامل ایلیوب
چوخ دولانوب یقین بابام طی منازل ایلیوب
خسته دی یاتمیوب یقین یوخدی قواسی عمه جان
قیزلارا عمه وئر خبر آغلاماسونلا بو گئجه
عارضه اشڪ آلینی باغلاماسونلا بو گئجه
گلدی بابام اورڪلرین داغلاماسونلا بو گئجه
دینجله گر ، یقین گئدر رنج و عناسی عمه جان
ڪرب و بلاده من گورن وقتیده جسم اطهری
باشی یوخیدی جسمیده داش دولوسیدی بستری
باشی گلوبدی بس هانی عمه یارالی پیڪری
ڪیمسه نین اولمیوب بئله درد و بلاسی عمه جان
گلدی بابام خرابیه عمه قوتولدی محنتیم
یوخدی داخی بو هجریدن دلده سنه شڪایتیم
قوی منی ممڪن اولسا تڪ ، وار بو باشیله صحبتیم
طشت طلاده دردیمین گلدی دواسی عمه جان
باخدی بیرآز او طشتیده یاره لی باشه اول بالا
عرض ایلدی بو باشیوه جانیم اولا بابا فدا
هانسی شل اولموش ال ائدوب باشیوی جسمیدن جدا
هم من اولوم بو باشیوین هم ده فداسی عمه جان
وار یری سس گله بئله آغلاما نازلی دلبریم
ای آناما مصیبت وغصه و غمده بنزریم
قوی دوداقون دوداقیمه دینجله بلڪه لبلریم
بیرده دئمه بو لبلرون واردی یاراسی عمه جان
آخشام اذان دئین زمان "صادقی "یازدی بو سوزی
دوشدی خرابه یادینه ایسلانوب اشکیله یوزی
گور نه سنون دلینجه خوش دفتره ثبت ائدوب ئوزی
بو گئجه وار خرابه نون آیری هواسی عمه جان
- شنبه
- 6
- دی
- 1399
- ساعت
- 20:51
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه