یازیلیب سردر میخانه خلقتده حسین
عشق حیسن شور حسین اوج جلالتده حسین
بوتون اعصاریده بیر نوریدی ظلمتده حسین
الی الدن اوزولن شخصیلره ایله خبر
باشلانور ماه محرم گتیرون دیده تر
یاشلی گوز اذن دخول حرم مولادی
کشورعشقه گذرنامه غم سقادی
غم ویزا یمیون بو قره لر ویزادی
هم وزیری هم اوزی چوخلی محبت الیر
ال بوشدا گله سن قووماز عنایت الیر
کرمه باخ حرمه من کیمی آلوده گیدر
اله فکرایتمیه سن واهی وبیهوده گیدر
خرداقیزلاردا گیدنده اورا آسوده گیدر
نه قویار قورخوشالار نه بیرینه سیلی دگه
نه بیری قمچی ویریب قامت رعنانی اگه
علتی واردی هرایل شهری سیه پوش اولونار
یاحسین سسلسه هرعاشقی مدهوش اولونار
اصغری باخسا جهنم اوتی خاموش اولونار
کیم قراسین گیه محشرده یولی سد اولماز
محضر حقده دعا ایلیه گر رد اولماز
وار روایتده ظهور عصری سرانجام اولاجاق
سینه لر غرق بلا خانه آلام اولاجاق
پنج تن حضرت مهدی له کی همگام اولاجاق
سرنوشت بشریت گنه تغییر ایدجک
بوحسین ناله لری اصلیده تاثیر ایدجک
اوندا کی غربت مهدی جوشاجاق داشلاناجاق
پنج تن گوزلری غربت سوزینه یاشلاناجاق
بیت معموریده تسبیح ودعا باشلاناجاق
هره بیر نحوی دعا ایلیجک یوم حضور
تاخداوندیدن آلسون آقاما اذن ظهور
حضرت ختم نبی عالمه طوفان سالاجاک
یاشیل عمامه سینی اللری اوسته آلاجاک
تادعاسی قوتارا سجده ده زهرا قالاجاک
جامه غم ملکوت اهلی بوحاله گییجک
عرشیان حاجت پیغمبره آمین دییجک
مرتضی ال آچاجاگ محضر داداره اوگون
جبرییل آعلیاجاگ حالت غمباره اوگون
جنیلر سس قوشاجاگ حیدر کراره اوگون
سوزش ناله سینه جن وملک غم ییجک
حضرت ختم نبی حیدره آمین دییجک
نوبت فاطمه دی ال آچا حق درگهینه
عرض حاجت الیه خالق مهر ومهینه
ویره آللهی قسم عشقیده شاهنشهینه
ناله سیندن گتیره لرزیه عرش وزمنی
عرض ایده خالق سبحانه اوتاندرما منی
مجتبی سبط پیمبرده دعا ایلیجک
ذکر مضطر اوخیوب یا صمدا سویلیجک
گورون اما آقامیز مظلوم حسین نینیجک
آچاجاگ ال کی دعا ایلیه غوعا دوشجک
سجدیه ختم نبی حیدر وزهرا دوشجک
حسن وکل ملایک اونا آمین دییجک
کاینات اهلی بوتون رخت توسل گییجک
جمله جنات وجهنمده بیله سویلیجک
بار الها بو حسیندور خلف ختم رسول
آقا اوغلی آقادی رد المه ایله قبول
بیلمورم هانسی مصیباتی شفیع ایلیجک
بیلمورم هانسی موثر سوزی یا سویلیجک
یاکی عباسین آدی گلسه خدا نیلیجک
هرنه دی ناله پر غصه سی طوفان سالاجاک
درگه حقدن آقام اذن ظهوری آلاجاک
فرقی یوخ علت الطاف خدا هرنه ده دی
اوگجه صاحبینیز صبحه کیمین سجده دی
نچه یوز ایلدی کی مظلوم آقامیز پرده ده دی
پنج تن حرمتینه حقدن عنایت گلجک
جبرییل الده نچه حکم وعنایت گلجک
صبح میعادیده مامور بشارت گلجک
آقامیز مهدیه آماده خدمت گلجک
بوتون عالملره آللهدان عنایت گلجک
ذوالفقاره اوگونی گوزلری یاشلی باخاجاق
کهنه پیراهنیدن تازه قیزیل قان آخاجاق
گوره سن اوندا سوسوز اصغری آرام اولاجاق
زینبین قولاری یا قمچیدن آرام اولاجاق
نهرعلقمده اوساعت نجه اعلام اولاجاق
دیجکلر گوره سن اکبره یارون نجه دی
یا حسینه آقاجان سینه پارون نجه دی
- دوشنبه
- 8
- دی
- 1399
- ساعت
- 23:28
- نوشته شده توسط
- یوسف اکبری
- شاعر:
-
استاد محمد ندایی مشهدلو
ارسال دیدگاه