باتدی چرخ شرفین مهر جهان آراسی
عالمی ترک ائلدی شیعه لرین مولاسی
تنگ اولوب روحینه آفاق بو وسعتله، گلیب
خیلِ جمعیت آرا تنگه ، دلِ تنهاسی
او ولایت گویونون اون بیریمینجی گونشی
اولدی خاموش اونون پرتو روح افزاسی
ائیلدی محنتیلن عالم ناسوتی وداع
اوچدی لاهوته طرف قاف حقین عنقاسی
چون هراس ائتدی اونون فضل وکمالاتیندن
اونی مسموم ائلدی معتمد عباسی
گوردی وجه اللهی اول مرد جفا پیشه ولی
گورمه دی نور حقی دیده ی نابیناسی
ایله ییب زهر جفا رهبر مظلومه اثر
گون به گون برگ خزان تک سارالیب سیماسی
عاقبت ترک جهان ایلدی اول میرهدی
عرش وفرشی بورودی محنت وغم آواسی
سامراده ائله بیل محشر کبرادی بوگون
باشلانیبدیر بوگئجه نفس(زکی)نین یاسی
تشنه لر فیض وصالیندن اولوبدور محروم
جان وئریب محبس ظالیمده کرم دریاسی
حجت ابن الحسن عسکری ای صاحب عصر
ای کفایت ائلین عالمه بیر ایماسی
صبر وئرسین سنه آللاه بو غم عظماده
چوخ چتیندیر آتانین هجرت جانفرساسی
ساخلاسین حفظ و امانینده سنی حی غفور
گَل کی گوزلر یولووی جدوون عاشوراسی
روحِ سعدیِّ زمان شاد، شهودی کی اونون
وادیِ شعرده وار مرتبه ی والاسی
نه گوزل قاعده ی شعرله تصویره چکیب
اهل بیتین غم و دردین قلم شیواسی
سنده صرف ائیله گیلن طبعووی آل اللاهه
یوخسا وئرمزله هدر یازماغا بیر عباسی
- پنج شنبه
- 11
- دی
- 1399
- ساعت
- 15:11
- نوشته شده توسط
- یوسف اکبری
- شاعر:
-
علی شهودی
ارسال دیدگاه