گورميوب زهرا كيمی اختر جهان وار تا جهان
شوهری مولا علی دور مدحينه قاصر زبان
سورۀ کـوثر گـلوبـدی شأنینـه قرآنیده
هَل اَتی اولموش علی شأنینده نازل بی گمان
قائلم ايجاد عالمده سبب دور جانلاری
مـا خَلَقْتُ سويليـوب پروردگار لا مكان
عالمی خلق ايلمزدی خالق ربّ جليل
اولماسيدی فاطمـه مولا علی اسلامه جان
بو ايكی نفسين خدايا وار نقدری عزّتی
عفّت وغيرت ازلدن خلق اولوبدی توامان
عصمت الله غيرت الله هر ايكي اهل كسا
افتخارما خَلَق خـاصّه عـفيفـه بانوان
اولماسيدی فاطمه اوّل امامون حامی سی
حق سچيلمزدی علی حقّی ديولمزدی عيان
اولماسيـدی فـاطـمه امر ولايتده شريـك
منزله چاتمازدی هرگز دين يولوندا كاروان
گرعلی دين اوسته دُزدی دُز مييدی فاطمه
غصب ايدنمزدی خلافت مسندين اول غاصبان
بعد پيغمبر اگر غصب اولمييدی حق لری
باشليه بولمزدی هنـد اوغلی بلالی داستان
اولماسيدی فاطمه اوغلی حسينون نهضتي
سينه سينه نقل اولانمازدی نقدری وار جهان
اولماسيدی فاطمه قاندان بويانمازدی حسين
مفتخر اولمازدی عشق اهلی خصوصاً شيعيان
ال قويوب بير انقلابه روز عاشورا حسين
قانيله يازدی قالا اسلام و قرآن جاويـدان
جان عالـم لر فدا عباس حسين قارداشينا
بير حسينون عشقينه بذل ايلدی جانانه جان
درد بی درمانه «عدلی» عشق دور درمان ايدن
عشق وار سنده ولی كوته قلم اُلكن زبان
- جمعه
- 12
- دی
- 1399
- ساعت
- 22:37
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه