مسموم کین ایدوبلر چون حضرت رضانی
آه و فغان شیعه دولدوردی بو جهانی
مسموم اولان رضا وای
مظلوم اولان رضا وای
میل ایلیوبدی جبراً بیر نچه دانه انگور
ایتموشدی میزبانی چون اول امامی مجبور
ظاهرده چاتدی کامه مأمون اولوبدی مسرور
امّا بیر اود سالوبدی یاندوردی ماسوانی
زهر جفا یتیشدی گل شاخیه بوداقه
سالدی اثر وجوده قلبه دله دوداقه
حالدان حالا قالوبدی دوردی امام ایاقه
چیخدی ستم سرادن الدن گیدوب توانی
نقل ایلوری اباصلت گوردوم گلور اوسرور
قدی خمیده پوزقون اول قامت صنوبر
اندام نازنینی بی تاب اولوبدی تیترر
بولدوم اولوبدی مسموم باشه چکوب عبانی
گورجاق منی بویوردی آچ منزلی اماندی
یاندی دلیم دوداقیم حالیم داخی دولاندی
پیک اجل یتیشدی بو حالیدن ایاندی
ایکاش گله جوادیم من جان ویرن زمانی
قاپلاری باغلا بیرده هم فرشی یغ کناره
حال غریبه اولماز کیمسه ایدن نظاره
من بیکس و غریبم اولماز بو درده چاره
توپراقلار اوسته ویرّم جانانیمه بو جانی
ناگه آچولدی قاپلار گوردوم گلوب جوانی
الده عمامه آغلار تا بولدی ماجرانی
آغوشه باسدی جان تک مسموم اولان آتانی
گوزدن توکوبدی قانیاش آغلاتدی ما سوانی
گوردوم بالا آتانون باشین دیز اوسته آلدی
سسلور غریب بابام وای افلاکه لرزه سالدی
غرق اولدی بحر غمده الله نه حاله قالدی
سس گلمدی آتادن ترک ایلدی بالانی
ای شیعه نسگل اولدی بو رسم کربلا ده
آلدی شه لب عطشان صحرای غم فزاده
اکبر باشین دیز اوسته گلدی فغان و داده
گوردی یاراسی چوخدی جان اوسته دی جوانی
سسلندی نچّه دفعه دور ای گوزوم ضیاسی
سندنصورا آتاون باشلاندی کربلاسی
حمل ایلرم جنازن وار گر چه چوخ یاراسی
تک قویموسان بو چولده من تک قوجا آتانی
(عدلی) شهابیدندی بوسوزلری یازوبسان
رحمت شهابه اولسون بحر اوستونه سالوبسان
حتما رضا الیندن بیر امتیاز آلوبسان
سالماز رضا نظردن سن تک اولان گدانی
- شنبه
- 13
- دی
- 1399
- ساعت
- 23:40
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه