قوللاری چون اولدی سقانون قلم
گوردی قدرت قالميوب دوتسون علم
سسلدی قارداشنی امدادينه
گل حسين عباسوون فرياد ينه
عشقوه بسته اولان سربازوام
ساقيم تشنه اولان جانبازوام
دوشمه ميش باشيم حسين الدن اَله
قويما قارداشون خجالتدن اُله
ايتديلرسو مشكيمی تيره نشان
سو كيمی قانيم آخورويرمور امان
اوخ دگوب بو مشکه من جان قويموشام
باورايله جان و تندن دويموشام
سوگيدندن ايله مأيوس اولموشام
گل كيمی جور وجفادن سولموشام
گل حسينيم قلبيده يوخدور دوزوم
قان دوتوب بوگوزلری گورمورگوزوم
احتياجيم وارحسين احسانيوه
گل بير احسان ايله بو قربانيوه
لطف ايله آل باشيمی دامانيوه
جانويروم جانانيمه جانانيوه
لذّت ديداری بيرآن ويرمرم
گل جمالون گورمسم جان ويرمرم
باش يارا پيكر يارا قوللار قلم
ساخليه بولموركسيك اللرعلم
گرچه وارقلبينده بير دنيا الم
سنسن آخرعرصه ده صاحب علم
من سنه سربازیدیم نه سر سپاه
اوخلانوب سو مشکی يوخ منده گناه
خجلتيم وار اصغروندن تشنه دی
آلّلها بير آلتی آيليق بنده دی
اول رسـالت باغونون نو باوه سی
اوج ايدوب افلاكه آه و ناله سی
اوچ گجه گوندوزدی هركسدن بتر
گوز ياشين رخسارينه گوزدن توكر
صورتين خط خط ايدوب ديرناقلاری
اللرين قونداقه باغلار مادری
هرنقدرلايلای ديور ياتمور بالا
هم سو فكرين هم صودی آتمور بالا
نه سو وار نه صود ربابون نيله سون
تاب ايدوب فرياد و آهه گلمه سون
شام و كوفه اهلی ايمان ساتديلار
مذهب و آئينی باشدان آتديلار
دعوت اوسته نامه لرچوخ يازديلار
راه دينی كج گيدوب يول آزديلار
جامۀ غيرتلرين چون سويدولار
زادۀ پيغمبری تك قويدولار
مسلمی ترك ايتديلر اولدی وحيد
جنگ ايدوب مردانه تا اولدی شهيد
آل قوجاقه آخرين سربازوی
ويرنشان بو صود امر جانبازوی
سويله دشمن تا بوله بوخسته دی
جنگه گلموب بوگل نو رسته دی
گرچه بو بيراخترتابنده دی
يوخ آناسيندا صودی شرمنده دی
ويردی بلكه جرعه سو بو اشقيا
رحمه گلدی دوشمنون ايتدی حيا
يوخ سوزوم گرچه سوسوزسوز قانيمه
سو ويرون بيرجرعه بوعطشانيمه
يوخ گناهی آنداولا پيغمبره
رحم ايدون اوغلوم علی اصغره
قتليمه فتوا ويروبسوز سربه سر
بو بالا شش ماهه دی تشنه جگر
خسته دی گوزلر آخوبدی سو كيمی
مادری آغلور ملورآهوكيمی
باغ دينون آچمين ريحانيدی
دوز باخوشدا صفحۀ قرآنيدی
خيمه لرده سوسَسی شيون سالوب
تكجه گل دور بو گلستاندا قالوب
قالميوب بوچولده يارو اکبریم
بيرقالور بولشکريمدن اصغريم
بولمرم دونمور ندن قانه فرات
ايچمييه عطشان قالاعين الحيات
تا دئدی بوسوزلری يومدی گوزون
آيرولوب روحی ديه بولموب سوزون
باغرينا باسدی او دم قارداشنی
توكدی رخساره حسين گوزياشينی
هر نقدری سسلدی سس ويرمدی
آغلادی آلام دل اسگيلمه دی
يوز قويوب قانلی يوزه گلدی ديله
سسلدی سرلشکريم ياتما بيله
سن يتوشدون مقصده اولدون شهيد
دشمن ايچره قارداشون قويدون وحيد
بير فقط شش ماهه اصغردی قالان
آج سوسوزدی تشنه ليق صبرين آلان
نطقه گل منله دانش دشمن باخور
گوزلريمدن گور نجه اشكيم آخور
سن بو صحراده منه بير شيريدون
بير كسرلی دشمنه شمشيريدون
يوخ بو صحراده كمك نه وارايليم
دورابوالفضليم منيم سندی بليم
سن ابوالفضل اهل دينه آبرو
وار اوركده (عدلیه) بير آرزو
سن وزيرشاه دين باب نجات
ايستوری سندن گينه گوندر برات
اُولمه ميشدن بيرده گورسون كربلا
دردينون درمانينه ايتسون دوا
- چهارشنبه
- 17
- دی
- 1399
- ساعت
- 20:25
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه