ای گولوم آلّانما ابلیس لعین اِغواسینه
آند ایچوب آزدیرماقا اویما اُونون وَسواسینه
بسکه اغفال ایلیوب چوخلار اولوب فرعون صفت
گویده آلله اوخلوری گردن دوتور موساسینه
مشکل اولموش هر زمان قرآن و دینی ساخلاماخ
باخما بیر عده شیوخ نَهروان فتواسینه
امر برمعروفیله کسب ایت ثواب آخرت
باخما چوخ بی اعتقاد و مُنکرون امّا سینه
صدمه ویرما احتکاریله مَعاش مردمه
آلّانوب تولانما دنیایِ دَنی حَلواسینه
باخما بیر عدّه چاپور بیت المالی مین رنگیله
حرمت اولمور قانونا نه ملّتین پیشواسینه
خضرتک پیغمبر ایستر تاپماسان هرگز بقا
جان آلانلار باخمیوبلر دنیانون الیاسینه
وقت قورتارساکفن دور قبریوه سندن گیدر
شاد اولار وارث ائوین اول پرده و دیباسینه
امتحان وار اغنیایه هم فقیره رهبره
اعتماد ایتمه یالان خلقین قوری تقواسینه
تا هِبوط ایتدی بِهِشتَن آدم اولدی دلغمین
گستروب یول جبرئیل آدم چاتوب حَوّاسینه
رهبریت اولماسا گمراه ره دور سالِکان
پیشوای دین گرکدور تا یتورسون گمرهی مأواسینه
منتخب دور اون ایکی حُجّت جهاندا بیزلره
اعتقاد ایت اونلارن سن غائب و پیداسینه
اوّلی مولا علی دور شیعه سی درک ایلیوب
بسته دور دنیا و عقباسی اونون اِیما سینه
کیمسه ده گر اولمیه حُبّ ولایت یوخ ثمر
نه نمازه روزیه زُهدیله هم اِعطاسینه
شیعه یعنی پیرو مولا علی و آلِ او
قول کیمی تابعدی هر اَمرایلسه مولاسینه
فُلکِ دینه ناجی دور اوغلی حسینِ فاطمه
اگلشن اول فُلکیده غَرق اولمیوب دریاسینه
نهضت دینی ایدوبدور آدلانوب شاه شهید
تا نفس وار اولدی صابر دشمنون ایذاسینه
اولدی رهبر نهضته تا روز عاشورا گونی
چوخ گوزل ایتدی عمل اوز نقشینین ایفاسینه
یازدی برنامه حسین بو نهضتینده زینبه
تا اسیر عشق اولا باخ قارداشون سوداسینه
نچه یوز مین ایل کچور اول وقعه دن امّا هنوز
آغلوری دنیاده گوزلر اصغر و عبّاسینه
کیم تاپا اُلفت حسینیله بیوک سودا ایدوب
یاد ایدر کربو بلاسین آغلار عاشوراسینه
آغلیین گوز بو حسینه آغلاماز محشر گونی
گوز یاشین توشه ایدوب چون بَرزَخ و عُقباسینه
مَقتَله باخسان یازانلار نقش ایدوبلر دفتره
نچّه مین لشکر یغوشدی کربلا صحراسینه
آدلارین مسلم قویانلار ظاهرا اهل نماز
باطناَ گلدی اوگون پیغمبرون دعواسینه
حقیله باطل آرا باشلاندی جنگ تن به تن
اولدی بیر عده شهید دگدی یارا اعضاسینه
دشمن دین غالب اولدی ظاهرا امّا حسین
باطنا پیروز اولوبدی روزگار اَدناسینه
بویالاندی طوی دوتوبلا کربلاده قاسمه
خالقه قربان اولوب گلدی ملائک یاسینه
جانویرنده هر شهیدتوپراقلار اوسته شاه دین
یوز قویاردی مهریله قانه باتان سیماسینه
تا منای عشقیده قربان ویره اوز اکبرین
بیر کفن سالدی الیله تا قدِ رعناسینه
خیمیه گتدی آناسی زلفونه شانه ویرا
سوسپوپ سالسون یولا اولسون وداع لیلاسینه
عازم میدان اولاندا کاسۀ مهری داشوب
هر قدمده حسرتیله باخدی سرتاپاسینه
قویمیوبلر سو یته عطشانلارا اخیامیده
غم یتوشدی بی نهایت کربلا سقاسینه
عزم ایدوب آلدی فراتی دولدوروب سو مشگینی
باخ مواساته دوزوبدور تشنه لیق ایذاسینه
آلدی کفّینه سوئی گوردی سرین سو سسلنور
عامل اول تعجیل ایله سقالوغون اجراسینه
ایستدی باغلانماسون اصغر قماطه اللری
سعی ایدردی سو یتورسن کربلا عیساسینه
اوخلانوب سومشگی آخدی چاتمادی سو اصغره
حسرتیله توکدی اشکین عارض زیباسینه
صاق قولون تاسالدی دشمن آلدی شمشیرین صولا
باخمادی اول قوم شومون ظلم بی پرواسینه
صول قولوندا سالدیلار باش یارلندی گوزده اوخ
سسلدی گل یاحسین باخ باشیمون غوغاسینه
آلدی اَدرِکنی سسین اخیامیده تا شاه عشق
دیلده قارداش گلدی اولسون دادرس عبّاسینه
چکدی گوزدن تا اوخی قویدی یوزون رخسارینه
آغلادی آغلاتدی زهرانی غم عظماسینه
دلده حسرت اول قَمَر ایتدی خسوف یومدی گوزون
چون یارا اوستن یارا ویرموشدولار اعضاسینه
سسلدی سیندی بلیم آچ گوزلرون یاتما اویان
ایت حمایت کربلانون زینب کبراسینه
باخمیوب دشمن اوگون مَهریّۀ زهرادی سو
ویرمیوب بیر جرعه ده دل باغلیوب دنیاسینه
ایلسون اِتمام حُجّت اصغره سو ایستدی
حرمله آتدی سه پر اوخ باخمادی فرداسینه
اوخ گلوب حلقین بیچنده قان دولوب قونداقینه
دیسگینوب آچدی گوزون باخدی اودم باباسینه
چکمه سون خجلت گولوب اوّل صورا یومدی گوزون
سیر ایدوب روحی گیده تا جنّتین اعلاسینه
سپدی قانین گویلره بیر قطره سی گلموب یره
عرش و فرشی قویدی حیران بو ایشین معناسینه
سیلکدی تادامنین یوز دوتدی عرش داوره
سوزلرین بیر بیر دئدی خلاق بی همتاسینه
من سنه اکبر دئمیشدیم بیرده ویردیم اصغری
لیک باتدیم سود امرده ماتم کبراسینه
شاکرم احسانیوه بو دشتیده اولدوم صبور
دوزموشم من اهلبیتین آه و واویلاسینه
لعنت انس و ملک گلسین یزیده حشره تک
قویمادی ظلمونده نقصان آل طاها یاسینه
من قتیل اشقیایم ( عدلی) آغلار حالیمه
نوکر درگه گرک دوتسون عزا مولاسینه
- جمعه
- 19
- دی
- 1399
- ساعت
- 22:49
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه