بسان بلبلم گل اوسته جور باغبان گوردوم
فلک صیّادتک بیرحم الینده اوخ کمان گوردوم
کیمه باخدیم دورنگیدی چوخ آختاردیم اولا یکرنگ
او اوصاف شیاطینی لباس آتدا نهان گوردوم
سوور دیم موج دریانی کف آلوده صدا ایتسون
اودا بیرحم اولوب ایلور طلاطم جان آلان گوردوم
ایدوب جنگ وجدل شاه لارنه توپراق ونه دین اوسته
مرام جنگینی تخت وجم وتاج کیان گوردوم
ولی قرآن ودین اوسته حجاب اوسته مرام اوسته
حسین فاطمه جنگین مرامین دلستان گوردوم
ایدوب دعوت اولا مهمان سران کوفه چوخ یازدی
دونوب شمشیرچکوب شاهه ایکوزلی کوفیان گوردوم
یزیده ایتمدی بیعت اوزی هم یاروانصاری
دایاندی کلمۀ لا ده کلامون جاویدان گوردوم
ویروب بیر گونده انصارین گچوب شش ماهه اصغردن
ابوالفضل و علی اکبر تمام پیر و جوان گوردوم
دیمه انصارینی ویردی قالوب بی یار و یاوردی
تمام انبیا گلدی ویره نصرت توان گوردوم
گروه جنیدن زَعفَرملک دن آب وبادآتش
گلو بلر نصرته امّا حسینده امتنان گوردوم
بویوردی منده وا قدرت بو دنیانی ایدم فانی
بو دشمن سهلدور زعفرسنی من قهرمان گوردوم
وارام عهد الست اوسته منم جانانیمه پابند
گرگ غلطان اولام قانه حسین عشقین عیان گوردوم
یتوب وقت شهادت دور گلور سس یاحسین گویدن
سر وعده گچم باشدان ندای الامان گوردوم
فلک چرخی سنایارب حسینی روز عاشورا
رسول الله اوپن حلقین اوپوپ خنجرسنان گوردوم
ایاصاحب زمان عفوایت کسیلدی تاحسین باشی
قره یل لراسوب طوفان قرانلوق آسمان گوردوم
باتوب گون قان یاغوب گویدن آغاشلار داشلار آغلاردی
او گون نقل ایلیوب راوی داش آتدا چوخلی قان گوردوم
ایدوب دین گلشنین پرپر دم شمشیریلن دشمن
ایچینده غنچه گل خندان پوزولموش گلستان گودوم
ال آچدی غارته دشمن ویروب اود خیمه لر یاندی
دیدی پاینده باد سجّاد اونی شیر زنان گوردوم
جهاندا رسمیدی قارداش بالاسین چوخ سور عمه
خصوص عمه اولا زینب رئوف ومهربان گوردوم
او گون وحشت یارانموشدی رم ایتدی آهوان دشته
پناه دوتدی خس و خاره پناه سیز آهوان گوردوم
اوگون حیدر قزی زینب یغوب باشه یتیمانی
یاری یانموش چادرایچره سوسوزخسته دلان گوردوم
گوزونده قان یاشی امّا اورکدن قدرته دارا
اسیر اولماقه آماده اونی بی خانمان گوردوم
گچوب تا نصف شب اولدی حسین باش سیزدوشن یردن
گچردی کاروان بجدل آدیندا ساربان گوردوم
نه چکدی زینب کبری گلنده قتلگاه ایچره
باخوب قارداشه ایلوبدی گوزون یاشین روان گوردوم
اسیران بلا نی تا گچیر دیبلر گلستاندان
اولوبدی محشرکبری گوزی گریان اولان گوردوم
بسان مرغ پر بسته اوشا قلار ناقه لر اوسته
دوشوب یول تا گیده شامه یورولموش کاروان گوردوم
یارلار یور قونی دورسال گیدو شامه باجون قارداش
دیردی زینب کبری اورکدن باغریقان گوردوم
یوزی گوی سمتینه سویلوب تقبّلنا رحیم الله
حسینیم دینه قرباندی دیلینده بو بیان گوردوم
گجه اولسا گیدر اوز آشیانینده یاتار هرکس
بو غملی کاروانی من گجه بی آشیان گوردوم
تمام خلق اولونموشلار مکان ایستر قالا«عدلی»
فقط خلاق رحمانی تک و هم لامکان گوردوم
- شنبه
- 20
- دی
- 1399
- ساعت
- 19:49
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه