کربلا چولونده گلدی قُمریلار نوایه قارداش
دعوت ایلیولَّه یاسلی زینبی عزایه قارداش
من دوزَن غمه دوزَنمَز دشت نینواده داغ داش
ئولمیشم دیریلمشم بوقانلی مقتلونده قارداش
زینبونده شمعِ عمری کربلاده سونسون ایکاش
ایندی خیمه لر بوچولده دوندی غم سُرایه قارداش
آل احمدون چراغی سوندی بوچوله گَلنده
اُف اولا بوروزگاره خوش گونوم قالوب وطنده
قاره یللر اَسدی اَسدی پوزدی گُللری چَمنده
زینت اولدی پاک قانون دشت کربلایه قارداش
شمر بیحیا دیورسن روحیمی سالوب کَمنده
روبرو منیله دوردی فاطمه گُلون اَزنده
من باخا باخا اوظالم سینون اوسته اَگلشنده
قان آخاندا یاره لردن گلدیم اِلتجایَه قارداش
چیخدی عرش کِبریایه گوئیا او بی مُروَّت
نیلیوبدی گور او ظالم سیندی جعبهء امامت
چکمه یله اوخلار اوسته ایلدی نجه جنایت
قالخیزوب اَلین او اَثنا فاطمه دعایه قارداش
گورمییدی گوزلریم کاش غم غم اوستونه دوزولدی
شعبه شعبه سیندی اوخلار چشمه چشمه قان سوزولدی
قلبوون داماری اوندا ایلورم گمان اوزولدی
گوئیا داغیلدی قرآن یرده آیه آیه قارداش
خَنجر اَلده گَلدی باطل حَقّی مَحو ائده اَرادن
شرم ائدوبدی تیغ عریان بوسه گاهِ مصطفادن
دوندروب سنی اوظالم ذِبح ائده باشون قَفادن
فرصت عمل یتیشدی بنت مرتضایه قارداش
سوز دولاندی گلدی بیرده خنجریله بیرسوز اوسته
خنجره ال آتدیم اوندا یاره سین آلام گوزاوسته
بیرطرفده من یخیلدیم بیرطرفده سن یوزاوسته
یاحسین سسی اوجالدی گوئیا سمایه قارداش
قالخوب اَندی تیغ عریان فاطمه گلوبدی داده
جَدّیمی چاغیرماقا من ایلدیم اودَم اِراده
باش جِداده سیره چیخدی پیکرون یره فتاده
سن یارالی من یارالی یوخ گلن هَرایه قارداش
عشقوون یولونداقارداش هربلایه من یورونم
یولارین توزیلایولدا مونس اولمیشام بورونم
نیزه لر باشیندا سن گز،تپراق اوسته من سورونم
تاپشورام گرک بونعشی ذات کِبریایه قارداش
گرچه بوبلالی چولده سیندی شاه دین سپاهی
آل سَرمدین سمایه اوج ائدوبدی دود آهی
آلتی گوشه لی مزارون عالمین اولار پناهی
ناز ائدر بودشت گُلگون مَسلخ مِنایه قارداش
(نادر)اولدی طفل وقتی آستانوون غلامی
عمرینی قویوب قاپوندا ای اونون سوسوز امامی
گونده عرض حاجت ایلرگوندرر سنه سلامی
گوز تیکوب سنه نظرقیل سنده آشنایه قارداش
- شنبه
- 20
- دی
- 1399
- ساعت
- 22:57
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه