چَرخین کَج اولدی گردش دورانی زینبه
زندان ائدوبدی عالم امکانی زینبه
دنیاده اَلّی ایل اونا یول یولداشیدی غم
پای آلدی مَعجریندن اونون هر قرا عَلم
امّا رشیده قَدّی اولوب کربلاده خَم
گوستردی دَهر دون بِله طوفانی زینبه
نَعشین گوروبدی قارداشینون قتلگاهیده
قلبی آلیشدی دوندی کولَه دود آهیده
گویا تاپوبدی یوسف زهرانی چاهیده
گوستر دئدی بو عرصه ده درمانی زینبه
سن مِهر بی غُروبسن ای شاه مَشرقین
اَعظم مصیبتون نجه گور سالدی شوروشِین
قان آغلیار غمونده چولون داشلاری حسین
نوحه اولوبدی قوشلارین اَلحانی زینبه
یوخدور سوزوم که عشقیده مین رَمز و راز اولار
درگاهِ حَقّه مُلتمس اهلِ نیاز اولار
امّا بو نوعی قارداش هایاندا نماز اولار
تفسیر ائدوبدی سجده سی عرفانی زینبه
کرب و بلانی آهیمیله داغلارام حسین
باغلانمیان یارالارووا آغلارام حسین
چاتسا اَلیم جدایه گوزون باغلارام حسین
چوخ دردیدور آچیق گوزوون قانی زینبه
باشون چاتوبدی قاتله نَعشون چاتوب منه
سن آغلا نیزه ده منه ، مقتلده مَن سنه
گورسه بیزی بو حالیده آغلار جوان نَنَه
باشون تَلاوت ایلوری قرآنی زینبه
اِحرامیدن چیخوبسان اگر ای گوزل حاجی
فاش ائت نجه اولدی یاره لی باشین یاشیل تاجی
قربان اولا جِدادن آخان قانووه باجی
گوسترمَه چوخ محاسن اَلوانی زینبه
قان آغلیار بو قانلی باشا چوللَرین داشی
وئرسیدیلَر اگر منه بو یاره لی باشی
قانه باتان یایاقی یوواردی گوزوم یاشی
تا که چاتیدی لبلرون احسانی زینبه
گرچه دوزوبدی سِیریمه غملر ، قطارینی
اما گَرک وِرام مَحَکه عشق عیارینی
بوسه ائدم بوغازوون ایندی دامارینی
صادر ائدوبدی عشق بو فرمانی زینبه
(نادر) بو زینبون غمینه بیر مثال یوخ
هر بیر مصیبتین بیلر اهل اشاره اوخ
امّا بو غملریندن اونون اِلتفاتی چوخ
وَقف ایله سنده دیده ی گریانی زینبه
- یکشنبه
- 21
- دی
- 1399
- ساعت
- 10:48
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه