ای شَباب عمریده بو دار دنیادن دویان
وی چَکن اَل آشیانیندن علینی تک قویان
آدیمی غم دفترینده گئتمگون ائتدی رَقم
عالم معناده آغلار حالووَه میر اُمم
راضیم گُل جسمووی دفن ائتمه میش منده ئولَم
من نجه ئوز خانمانین ترک ائدن یاره باخوم
بو یانان درگاهه یا بو قانلی مسماره باخوم
هر گجه بو مرتضی سن سیز بیابانی گزر
جسمینی گرچه بیلورسن هاوَن مِحنت اَزر
یاسووی امّا عَم اوغلون دشت وصحراده بَزر
گورسه مجنونلار منیم حالاتیمی دل داغلیار
گوز یاشیمنان درس آلار گویده بلوط لار آغلیار
چوخ سوزی واضحدی هَر کیمسه دِیَر بیر هَمدمه
سن ولی ئوز دردووِی بیلدیرمَدون یاندون غمه
قالدی نیلی صورتون گیزلین نه مدّت مَحرمه
هر غمون بیر صَخرهء صَمّانی غمدن داغلیار
وای علینون حالینه بو نِسگیله قان آغلیار
بو جوانلیقدا سلام ائتدی سنه پیک اَجل
جَنَّت الاَعلایه دعوت ایلیوب حَیّ اَزل
سان وئرور غملرمنه مِحنتلر اولدی اَل به اَل
فتح خیبر که او گون ائتدی منه نام آوری
روزگار امّا بو گون سالدی اَیاقدان حیدری
بو قاپی اولدی بیلورسن مرتضایه گوز داغی
سوز آهیم وار یری ایندی اَریدسه هر داغی
باغبانه تاپشورورسان بو خزان گورمیش باغی
کاتب غم آدیمه غم دفترین باغلار بوگون
باغبانون حالینه بُلبللرون آغلار بو گون
مَحبسه دونسه اگر بو ائو منه ، من نیلَرم
گَلسَه ائوده بو اوشاقلار شیوَنه من نیلَرم
ایسته سَه کلثوم اگر مندن نَنَه من نیلَرم
آغلاسا اِیتامووَه عرش بَرین من نیلَرم
بیرگونی زینب قزون چیخسا گَلین من نیلَرم
فاطمه جان بذل ائدوبسن (نادره) سن آبرو
عشقوویله یول گزر بَرزن به بَرزن کو به کو
مجلس ماتمله اولسا هر مکاندا روبرو
چون بیلور اول مجلسون زهرادی صاحبخانه سی
قصد اِحرام ایلیر اوردا دولار پیمانه سی
- یکشنبه
- 21
- دی
- 1399
- ساعت
- 10:54
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه