ای قلم شرح غم ایله سوزی چکمه اوزاقا
میزبانلار نجه یاز یاره وروبدور قوناقا
بویانوب قانه اونون پیکری باشدان ایاقا
فاطمه بسله دیگی گولدی بومقتلده سولوب
ایستی قوملار نجه گور یاره لره مرهم اولوب
اوت یاغوردی ائله بیل سوزش گرمادن اودم
جبرئیل اندی یره شاهه باشین ایلدی خم
دئدی ای سید جنات برین ، فخر امم
اذن وئر محفل عرفانیده مهمانون اولوم
گوزلیم آچ گوزووی باخ منه قربانون اولوم
چکوری اهل سما نازووی ای پاک سرشت
بیرنظر ائتسون اگر گوهر اولار خاکیله خشت
منتظردور قدم پاکووه باغات بهشت
بس ندن منزل ائدوبسن بو چوخور ماواده
گون قاباقینده یاتوبسان بله بیر صحراده
اذن وئرسون منه گودالیده سنله قالارام
عطر طاهانی آقا ، گل بدنونن آلارام
آچارام شهپریمی اوستووه سایه سالارام
یاسووی باشلامامیش قارووی گویده گیه نم
سانما بیگانه ، بشیکده سنه لایلای دیه نم
فاطمه اوغلی او اثنا سوزونی آچدی بله
جبرئیله دئدی سن شهپرووی باغلا هله
وادی عشقیده حاشا ائده عشق اهلی گله
اولما حائل آرادا تا غزل جان اوخیوم
نیزه نی منبر ائدیم نعشیمه قرآن اوخیوم
یاحسین درگهووین گرچه یوزی قاره سیم
(نادرم) عمر بویی عشقووین آواره سیم
دردیمه چاره آدوندور نه که بیچاره سیم
جسم بیجانیم او گون که قره تپراقه گئدر
بیرباخیش باخسون اگر قبرینی نورانی ائدر
- یکشنبه
- 21
- دی
- 1399
- ساعت
- 10:57
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه