آغلا قان آغلا گوزوم اصغر عطشانه گوره
باب حاجتدی آدی خورداجا دامانه گوره
اصغرین آدی منیم شعریمه دوز قاتدی گنه
اهل دل گورسه اونی تا که حکیمانه گوره
خوردا سرباز ئوزونی ایستدی عباسه قوشا
وادی عشقه دوشوب سیریده عرفانه گوره
بیلدی فرماندهی میداندا آدامسیز دایانوب
گلدی معناده دیله حضرت مَنّانه گوره
دئدی ای عرصهء میدانی آدامسیز دولانان
کف اخلاصه قویان جانینی جانانه گوره
الی قوینوندا دولانما بابا یاندیرما منی
لشکرون قویما سِنا بیر بله طوفانه گوره
هَله من ئولمه میشم گَل بابا اخیامه طرف
عرضیمی سالما یره غنچه ء خندانه گوره
شاهبازون یخیلوب ای شه گردون خَدَمه
خوردا شهبازووی قوی باری بو بیگانه گوره
عَموم عبّاسیدن اِلهام آلورام عشقیمه من
ایستورم پیر خِرد عشقیمی مردانه گوره
اصغر اولسامدا اگر رتبه ده اکبر تاییام
امتحان ایله اَلَستونده کی پیمانه گوره
گرچه یوخدور قولومون قدرتی جنگ ایلَمَگه
شیر بَچّونده گرک رزمی دلیرانه گوره
یاره لی سینووه قَلخان عوضینده منی آل
پیکر شاهه گلن اوخ ،گَله قَلخانه گوره
تای توشوم گولسه گُله من گولرم اوچ پر اوخا
پوزمارام حالیمی اصلا بِله پیکانه گوره
منی گُللردن آیرما سنی اکبر جانی گَل
غُنچووی گُللره قوش قوی اودا گُلخانه گوره
قدم آتسیدیم اگر زحمتیم اولمازدی سنه
اَلون اوسته گَل آپار داور سبحانه گوره
اوشاقین دردی اولاندا بیلر اَوّل نَنَه سی
یوخ دئمز ایسته سه گر جانینی درمانه گوره
سینه سینده نَنَمون رَدّی قالور دیرناقیمون
منی دوشدن آیروب سینه ده کی قانه گوره
زحمتیم چوخدی بو گونلرده نَنَمدن خَجِلم
اودا مَندن اوتانور بو قوری پِستانه گوره
گَل خلاص ایله اونی هم صودامر عاشقووی
عشق میقاتینی قوی عاشق مستانه گوره
منه گهواره سنه تنگیدی دنیا یوزی ، گَل
ایله بیر چاره بابا هر ایکی زندانه گوره
ایکی یورقون ایکی تشنه ایکی قارداشی ئولن
قوی نَنَم حضرت زهرا بیزی یان یانه گوره
نَنَه می ترک ائدورم تا سینوون اوسته یاتام
گِنه آغوشووی آچ بو قوزی قربانه گوره
اصغرین خورداجا دامانینه(نادر) آل آتار
اَلی چیخماز بوشا بو دیدهء گریانه گوره
- یکشنبه
- 21
- دی
- 1399
- ساعت
- 11:34
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه