اولسون سلام هو دیوب عشقه چاتانلارا
عشقون یولوندا هرنَه یی باشدان آتانلارا
اولسون سلام دشت بلاده قوناقلارا
اولسون سلام شیخیله شابه اوشاقلارا
اولسون سلام تشنه یانان دیل دوداقلارا
اولسون سلام ناوک پیکان نشانینه
اولسون سلام عرشه گئدن پاک قانینه
مرغ قریحه تاپدی سوزی طَبعی جوشلادی
پروانه دن چکوبدور اَلین شمعی بوشلادی
اصغر آدیلا شعرینی سوزلرده خوشلادی
بیر صودامر که دفتر عُشّاقی باغلادی
اَوّل اوخا گولوبدی صورا باخدی آغلادی
عشقه بَلی دیوبدی هَله آچمامیش دیلین
رَخت شهادتی گیونوب گورمَه دی ایلین
اَگدی او خوردا اَللری شَدّادیلَر بِلین
بابَ الحوائج ائتدی اونی حَیّ کردگار
درمان ائدر دیون گَله هرکیمسه دردی وار
تشنه دوداقی نَهر فراتین سویون آتوب
دان اولدوزی دِیوللر اونا چونکه تِز باتوب
قانین حسین فاطمه نون قانینه قاتوب
مَعنا دیلیله عرض ائله دی شاه محشره
باشون سلامت اولسون آتا باخما اصغره
ئوپدون دوداقیمون یاراسین دوشدی هَمهَمه
اَهلی سَمانی قانلو دوداقون سالوب غمه
حسرت گوزیله هِی باخوسان نَهر علقمه
یوخدورعموم اَلوندن آلا شیرخوارووی
تپراقون اوسته قوی منی سن باغلا یارووِی
ای مرتضانون اوغلی غمه بیرده تاب ائله
قربانلیقون قبول اولا گَل بیر ثواب ائله
تُحفَم آز اولسادا باباسن چوخ حساب ائله
عبّاس عموم اگر چه سنه شاهبازیدی
دیلسیز بالوندا اَللروون اوسته بازیدی
میدان عشقیده نِجه گور قانه باتموسان
دنیا تَعلّقاتینی سن باشدان آتموسان
بیرصوداَمردَه جمع شهیدانه قاتموسان
آغوشووه بوخورداجا سربازی آلموسان
مَمنونووم بابا منیده یاده سالموسان
سَپ قانیمی سَمایه بابا شرح قال ائله
قوی منله بیرده یوزیوزه رَفع مَلال ائله
اسباب زحمتم بالووِی گَل حَلال ائله
مَرهَم ائدر فَلک یاراما قاره تپراقی
آسوده گئت آپار نَنَه مَه قانلی قنداقی
اَملیک اووا بوچولده اگر چه شباهتم
طفلم ولیک عشقیده صاحب صَلابتم
مَندن نَنَم خَجِلدی من اوننان خَجالتم
اوچ پراوخ اولدی باعثی ایندی آرالیام
آتدیم اوگاهواره نی بیلدیم هارالیام
غنچازمانی دَهر دَنی ایسته دی سولام
اَمّا خوشام بابا شَجَر عشقه بیر خولام
سینونده یاتماقیلا گَرک من مِدال اولام
بیرگون بوچولده چوخلاری زوّار اولارسنه
ششگوشه قبریده هامی للایلای چالارمنه
(نادر)گوزون یاشی گنه ده آخدی دفتره
عود غمی سالور قلمون اودلی مِجمَره
دان اولدوزی چیخوراونا باخ آغلا اصغره
اوخشا سحرستاره سی اول ماهپاریه
آغلا او چولده غارت اولان گاهواریه
- یکشنبه
- 21
- دی
- 1399
- ساعت
- 11:58
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه