گجیله کیمدی بو یارب بِله گلمیش تَمنّایه
سالوبدور درد وغم گویا اونی دریای اِیذایه
بو آدمدور که جَنّتدن چیخوب هجرانیدن آغلار
نِدامت صحبتین شاید ائدور چوللَرده حَوّایه
خلیلُ اللّهیدور اولما دوشوبدور نار نَمروده
دیور یارب گلستان اِئت بو ناری عَبد یکتایه
سَمَک بَطنینده یا اینکه مناجاته گلوب یونس
اوجالدوب ناله سین باشدان یتورسون طاق مینایه
ویا نوح نَبی دوشموش بلایه آغلیار غمدن
قالوب طوفان آراسیندا باخور وحشتلی دریایه
کلیمُ اللّهیدور شاید سیزیلدار ساحت قُدسه
مناجاته گلوب گویا گجیله طور سینایه
بو ناله ایلین اولما اولا یعقوب کَنعانی
اَلینده قانلی بیر کوینک یخیلمیش باب مَعنایه
و یا یوسفدی چاه ایچره هَرایه دادرس ایستر
تاپا بازار مصری تا گئده قصر زلیخایه
بو شاید داریده مَصلوب اولان عیسی بن مریمدی
سیزیلدار تا عروج ائتسون سَماده قُرب اَعلایه
اولانماز کیمسه بو یوخ یوخ غلط تَحلیل اِئدر ظَنّیم
گِنه بو طایر فکریم گلوب مین رَمز و اِیمایه
نُه آدمدور نَده نوح و خلیل و یونس و یعقوب
یاراشماز بیر بِله ناله نَه موسایه نَه عیسایه
علیدور غملی رُخسارین قویوب دیواره قان آغلار
چکوب اَل غسل زهرادن گلوبدور شور وغوغایه
اولوبدور برمَلا سِرّ خانیم زهرا او وقتیکه
خطادن آی اِشیق سالدی او صدمه گورمیش اَعضایه
علینون پوزقون احوالین اَلیکه درک ائدوب اَسما
تعجّبله دیله گلدی بِله عرض ائتدی مولایه
نَدور بو ضَجّه وشیون نَدور بو ناله یا مولا
علی جان سن که واقفسن تماماً سِرّ اِخفایه
بیزه اَمر ایلدون حاشا اوجادان آغلاسون کِیمسه
مبادا سس گئدوب چاتسون بو یثربده او اَدنایه
ئوزون اَمّا بو اثناده نَدندور گلموسن داده
اگر یوخ مَحرم دردون دِئ دردون باری اَسمایه
اوجالدی ناله سی بیرده بویوردی بو سوزی مولا
گوزوم عُمّان اولا کَمدور بو فقدان غم اَفزایه
چراغیم سوندی یثربده آدامسیز قالمیشام نیلَک
آپاررام دردیمی سوزیوخ گجه لَر دشت و صحرایه
امیدیم نا امید اولدی گِنه صبر ایلدیم ، اَمّا
منی توش ائتدی بیر مِحنت بِله بیر درد عُظمایه
بو یورقون جسمون اَلسّاعَه سینان پهلوسینی گوردوم
قوجالدیم غُصّه دن اَسما ،گَله لعنت بو دنیایه
سینان پهلویه آغلاردیم یوزه بیر آیری غم چیخدی
ساتاشدی زلفین آلتیندا گوزوم بو لَکَّه لی آیه
بو غسله سو نه لازمدی مَنِ مظلوم اولان یرده
روادور غسل اگر وئرسم گوزوم یاشیله زهرایه
علینون مِحنتی (نادر) تمام داغلاری داغلار
امام عصر ئوزی شخصاً اولار واقف بو معنایه
- یکشنبه
- 21
- دی
- 1399
- ساعت
- 11:59
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه