ای کونول باشلا سوزی محضر جانانه یاواش
سنده آوازووِی قوش قُمری خوشخوانه یاواش
لاله لر آچدی چیچکلَندی گنه دشت و دَمن
داغداکی چَنلر اَنوب طَرفِ گلستانه یاواش
بیر گوزلدن آلوری عطرینی عَطّار سحر
بو شمیمی سَپه لور هَر یِره هَریانه یاواش
توتیا عَدنیدن آلمیش اَله نقّاش اَزل
یاراشیق وئردی ایکی گوزلره مژگانه یاواش
لعل لب طعنه وِرار رنگ عقیق یَمنه
چاتدی آوازه سی یاقوتیله مرجانه یاواش
تِل تِل اولموش یوزونه ،طُرّهء طَرّاری اونون
بله بیر حُسن اِئلیر عاقلی دیوانه ،یاواش
دولت حُسنی تَحیّرده قویوب هر گوزلی
درس حُسن ئورگدوری یوسف کنعانه یاواش
کیم ساتاشدی گوزی اول بَدر مُنَوّر گوزونه
آشنالر اوجا بَه بَه دئدی بیگانه یاواش
مِدحَتِ حُسنینه عاجزدی قلم ،چاره نَدور
پَر کاهی ائله بیل سالمیشام عُمّانه یاواش
بو وَجاهتله گلوب وادی مقصوده طبیب
چاغیرون دردی اولانلار گله درمانه یاواش
گوندریب پیکرهء عشقی یِره حضرت عشق
عشقی تعطیل ائله دی شمعیله پروانه یاواش
قدمی آچدی اونون،عالمه رحمت قاپوسین
گون ساتاشدی ائله بیل لیلهء ظُلمانه یاواش
جاعَل الحَقدن صورا بیر دون زَهَقَ الباطله باخ
طاق کَسرانی نجه ایله دی ویرانه یاواش
حضرت ختم رُسل وئردی جهانه یاراشیق
آچدی خوان کرمین بو گجه مهمانه یاواش
سنده (نادر) بو گجه منزل پیغمبره گئت
چال قاپی صبحه کیمی لِیک ذَلیلانه یاواش
- یکشنبه
- 21
- دی
- 1399
- ساعت
- 22:52
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه