دوشوبدی تپراقا بیر شاه بی اَمان یارالی
وجودی باشدان اَیاقه اولوبدی قان یارالی
گرک دِیم که بو قان حضرت اَحد قانیدی
مکان ائدوب ئورگین چونکه لامکان یارالی
یانوردی دیل دوداقی شدّت عَطشدن لیک
فَراتَه ناز ائدوری شاه اِنس و جان یارالی
اگر او خِضر نَبی گورسه بو یانان دوداقی
وِصال آب حَیاتی تاپار گمان ، یارالی
آخاندا قانی یازار لا اِلهَ اِلاَ الله
اولوبدی والهِ جانان بو خسته جان یارالی
مُروَّت اولماسا گر میزبانلار ایچره یقین
چوخور یره یخیلار تشنه میهمان یارالی
دایانما فاطمه گَل یوسفون دوشوب چاهه
مَلک لَر آغلیوری باشلا سن فغان یارالی
حسینون ایندی خانم آشیانه سیز قوش تَک
سینوب قَنادی دوشوب چوللَره همان یارالی
یارالی قامتیلن هِی دورار گِنه یخیلار
باخاندا آغلیوری اهل آسمان یارالی
گوی اهلی ایسته دیلر تا حسین عُروج ائتسون
یِر اهلینه قالا بو شرم بیکران ، یارالی
آچوبدی سینه سینی کربلا یِری او زمان
حسینه مُلتمسانه ائدوب بیان ، یارالی
بو سینه می گَل حسین بَستر ایله اصغریلَن
سنه بو ئولکَه اولار یاخشی آشیان یارالی
چالاندا اصغره لایلای بو چولده قُمریلَر
جهانی داغلیاجاق بوردا نوحه خوان یارالی
مَزارووِی بیله جَک عَدنیدَنده باش (نادر)
اولاندا کعبهء عشقی بو آستان یارالی
- یکشنبه
- 21
- دی
- 1399
- ساعت
- 22:55
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه