اولين فديه سلطان شهيدان مسلم
كشته راه حق ومنطق و قرآن مسلم
سالك راه حقيقت گل بستان عقيل
مست و سرمست مي ناب خداوند جليل
سيرتي حيدري وصورتي زيبا و جميل
عاشق ذكر و دعا مظهر ايمان مسلم
حضرت حقين عقيل اوغلي گوزل بنده سيدي
لقبي سيف بني هاشمه زيبنده سيدي
كوفه ده مظلوم حسينون او نماينده سيدي
نجه كي حيدره مقداديله سلمان مسلم
يتشوب كوفيه برنامه سين اجرا ايلدي
نهضت حقه گوره نقشيني ايفا ايلدي
پرچم عشقي ازل كوفه ده برپا ايلدي
تاپدي ظاهرده دل ناخوشه درمان مسلم
ديديلر گلسه حسين شهره خرامان اولاريخ
اياقي آلتدا اونون عشقيله قربان اولاريخ
هرنه امر ايله سه لر گوش به فرمان اولاريخ
نامه ياز تا گله تز كوفيه سلطان مسلم
يازدي اربابينه مسلم سنه قربان تزگل
ياحسين يوردي مني تلخي هجران تزگل
كوفه گوزلور يولوي بويره مهمان تزگل
يولوا گول سپوري خسروي خوبان مسلم
كوفه ده يابن الحسن باد مخالف اسدي
ابن مرجانه بيلورسوز كي نجه ناكسدي
كوفه ده مكري اونون رشته الفت كسدي
دوستلارون دوندي اولوب هاميسي عدوان مسلم
ايش چاتوب بير يره قلبيم باشي شدتله يانور
تك قالوب كوچه لري نايب سلطان دولانور
گه گيدور گه اوتورور غمزده گاهي دايانور
ايله بيل كوفه ده هيچ يوخدي مسلمان مسلم
تكيه ديواره ايدوب سسلدي اي بادصبا
بو پيامي آپار الساعه وطنده آقاما
كوفيه گلمه دينن كوفه لي ده يوخدي وفا
ياحسين گلمه قالوب شهريده ويلان مسلم
ايندي بو منظره ني دردي اولان آل نظره
صبحه جك مهمان اولوب قورخولي كوي و گذره
طوعه نين دوشدي گوزي اوندا غريب بيرنفره
ديدي كيمسن ديدي من لبلري عطشان مسلم
ديدي بيرجرعه سوعطشان قوناقا ويرآناجان
من غريب الوطنم يوخدي كسيم حاليمه يان
اجروي فاطمه دن هر ايكي دنيا آلاسان
سويي ميل ايلسه حاله گلر الان مسلم
الغرض سوگتيروب طوعه آقا نوش ايلدي
گيتمدي قلب ايويني غم تيرينه توش ايلدي
تكيه ديواره ايدوب غصه لري جوش ايلدي
ديدي گيت منزلوه اولسا گر امكان مسلم
ديدي بو شهريده يوخ كيمسه اونا تكيه ايدم
يالقوزام چاره سيزم يوخ دي يولوم تا قييدم
گزورم شهري غريبانه هارام واردي گيدم
تانيمورسان منم اول غمكش دوران مسلم
مسلم آدين ايشيدوب طوعه اورگدن چكوب آه
ديدي منت منه قوي گل ايوه تا وقت پگاه
مسلمه طوعه اوينده اوگيجه ويردي پناه
اوخودي صبحه كيمين صوتيله قرآن مسلم
صبح آچيلدي آقا آماده پيكار اولدي
طوعه دن ايتدي خداحافظ اوركدن دولدي
طوعه نين ده ايله بيل رنگي بوغمدن سولدي
كفريله جنگ ايلسون چيخدي رجزخوان مسلم
توكولوب فوج اراذل آقاني دوره لدي
گلني پورعقيل وارد نيران ايلدي
ياعلي ديلده آقا دشمني قانه بلدي
ايليوب هرگلني قانينه غلطان مسلم
من عقيلون بالاسي معرفت آيينه سيم
هاشمي دور نسبيم حضرت حق بنده سيم
شاه عطشان دهنين يار و نماينده سيم
ايليوب كوفه ده برپا نجه طوفان مسلم
الغرض مكريله غملي اورگين داغلاديلار
آلديلا شمشيريني قولاريني باغلاديلار
دوشدي بيرحاله كي قوشلار حالينا آغلاديلار
سالدي گوداله سني قوم لعيمان مسلم
عار اولا حشره كيمي كوفه لينون غيرتينه
دشمنون دقت ايله قلبيده كي نخوتينه
ويردي بير ضربه اونون بكردني صورتينه
ديشلري سيندي دولوب آغزينا القان مسلم
محضر ابن زياده گتوروبلر او يلي
وارد مجلس اولوب عرض سلام ايلمدي
ديدوله عرض سلام ايله اميره علني
ديدي مولا دي منه شاه شهيدان مسلم
حضرتي بكر آپاريب دارالاماره بامينا
صيدي سالميشدي نجه ظالم كافر دامينا
باشيني ذبح ايلدي خصم يتيشدي كامينا
درديني باد صبايه ايدوب اعلان مسلم
اوجا يردن باشيلا قانلي بدن گلدي يره
باش و جاندان ره جاناندا گچن گلدي يره
اولين هديه سالار زمن گلدي يره
طوعه ده سسلدي ايمانوه قربان مسلم
(آذرين)عشق حسين مسلمي تسليم ايلدي
عالمه عشق و وفا درسيني تعليم ايلدي
مظلوم اربابين عزاداريني تكريم ايلدي
ايليير شك ايلمه دردوه درمان مسلم
- چهارشنبه
- 24
- دی
- 1399
- ساعت
- 18:48
- نوشته شده توسط
- یوسف اکبری
- شاعر:
-
ودود آذرین خلخال
ارسال دیدگاه