سبک : ای ویرن ویرانه یرده...
ای ویرن لب تشنه جانین دینینه قربان حسینیم
دورایاقه گلدی زینب قبروه مهمان حسینیم
ای شه عطشان حسینیم
قبروه قربان حسینیم
زینب باجون سنون سینونده اولان یاروه قربان.... ای خسروخوبان
نهراوسته لب تشنه قولسوز علمداروه قربان .... ای شاه شهیدان
عصرعاشوربلاده قوپدی طوفان مصیبت
یتمیش عاشق بیرگون ایچره ایچدیله جام شهادت
لشکر بی عارکوفه خیمگاهی ایتدی غارت
قیزلارون آواره قالدی اولمادی درمان حسینیم
بیرگجه یانمش چادردا عترتون شام غریبان
قوزادی افغان و آهین گویلره سرگشته طفلان
سوزآهیندن ربابین ناله ایتدی کون و امکان
صبح اولوب یولاندی شامه عترتون گریان حسینیم
عترتون قولاری باغلی کوفه و شامی دولاندی
باشلارا سرنیزه لرده داش دگوب قانه بویاندی
شامون اهلی نه آتامدان نه پیمبردن اوتاندی
حق اوزی ایتسون گرکدور آرادا دیوان حسینیم
شامیدن آزاد اولوبدی عترتون دیداره گلدی
غمکشیده قیزلارون گو باشلاریندا قاره گلدی
محمله باشین ویروبدی زینبون باش یاره گلدی
گوشه ویراندا قالدی بیرقیزون مهمان حسینیم
اربعین زواری اولموش عترتون بیربیر سلامت
رخت دنیانی رقیه سویدی قارداش ایتدی رحلت
نازلی جیران بابتیندن اولموشام گورنه خجالت
تاپمادیم نازلی بالانون دردینه درمان حسینیم
قبرون اوسته دختران غمکشیده گلدی قارداش
لیلی وکلثوم گریان هم سریه گلدی قارداش
هم رباب بینوانین آهی دیلده گلدی قارداش
اصغره قرخ گوندی آغلور مونس هجران حسینیم
باشیمون بیلسه بلاسین مهر وماه و اختر آغلار
باش آچارجنتده حتی شاه مردان حیدر آغلار
قمچی ردین قولاریمدا گورسه غملی مادر آغلار
خوش گونه حسرتدی زینب قلبی اولموش قان حسینیم
خیمه لر یاندی اساسیم کربلاده اولدی غارت
عفو ایله یوخ ترمه شالیم تا ایدم ایفای خدمت
دورت مین اوخلی کوینگوندی آلتی گوشه قبره زینت
قبرون اوسته کاش ویرم جان ای شه دوران حسینیم
قبروه بیرعده غمدن پروبالی بسته گتدیم
دختران بوترابی غصه لردن خسته گتدیم
آهوان نوحه خوانی جمع ایدوب بیردسته گتدیم
سینه زن مداح و شاعر جمع اولوب الان حسینیم
قبر شش گوشون اگرچه((آذرینه )) اولدی قسمت
حیف اولا اما واریمدی قلبیده بیر عمده حسرت
قسمت اولموب بوحقیره اربعینده بیر زیارت
قویماقالسین غم اورکده ای شه عطشان حسینیم
- چهارشنبه
- 1
- بهمن
- 1399
- ساعت
- 18:11
- نوشته شده توسط
- یوسف اکبری
- شاعر:
-
ودود آذرین خلخال
ارسال دیدگاه