مُحرران وفا مُنشیان محنت و غم
ائدوبله اوّل سرلوحه ده بو نوعی رقم
خرابه نون قاپوسیندا اسیر قوم عناد
امام مُفترضُ الطاعه سیّد سجاد
دوروب ائدردی تماشا ملول و دل ناشاد
گوروب بیر آهونی صید ایلیوبدی بیر صیاد
کئچنده آهو دونوب باخدی بیر امامه طرف
دیردی باطناً ای ابن شهریار نجف
ترحم ائت منه ای پادشاه عالمیان
ئوزوم دچار قالوبدور ایکی بالام ویلان
چاغوردی اوچونی فرزند سرور بطها
خلاص ایله بویوردی بونی رضای خدا
گئدوب بالالارینون حال زارینی بیلسون
قالوبلا آج اولارا صود وئروب گنه گلسون
اگر قیتمسه من ضامنم بو آهویه
بهاسینی وئرورم گرچه گئتسه هر سویه
دونوب امامه باخوب حیرتیله اول صیاد
شمادتیله دئدی ای اسیر دل ناشاد
اگر سنون بو قدر ثروت و جلالون وار
خرابه دن و بو زنجیردن ئوزون قورتار
الین اوزاتدی یره سرور حجاز و عراق
گوتوردی وئردی او صیاده بیر اووج تپراق
ائدنده تپراقا صیاد دقتیله نظر
نه گوردی تپراق اولوبدور تمام دُر و گهر
دوشوب ایاقینه عرض ائتدی کیمسن ایله بیان
آتام آنام ئوزوم اولام آقا سنه قربان
بویوردی حجت باری منم امام زمان
آتام حسیندی سوسوز کسدیلر باشین دالیدان
یوزون ایاقینه قویدی به دیدهٔ گریان
دیردی عجزیله العفو یا امام زمان
دوروب آچوب ال ایاقین بوراخدی حیوانی
ئوزوندن ایلدی راضی امام والانی
خلاص اولجاقین آهو قویوب بنای فرار
او قدر گئتدی که تا گوز ایویندن اولدی کنار
دوروبدی اوچی ولی کئچمدی او قدر زمان
ایکی بالاسی یانیندا یتیشدی اول حیوان
دوشوب ایاقلارینا اذن وئردی گوز یاشینا
دوروب امام زمانون دولاندیلار باشینا
دیردی باطناً عهدیم باشا یتیردیم آقا
بو ایکی طفلیمه صود وئرمدیم گتیردیم آقا
دولوبدی دوشلریم ای پادشاه هر دو سرا
اجازه وئرسون اگر صود وئرم بالالاریما
بویوردی آهویه اول یادگار ختم مآب
آپار بالالاروی ائت خرابه ده سیراب
گتوردی گوشهٔ ویرانیه ایکی بالانی
آلوب آرایه ایکی صود امر بالا آنانی
اَمَردیلر ایکی یاندان باخاردی آل الله
خانملارون آراسیندا گوروبدیلر ناگاه
اوجالدی ناله علی اصغرون آناسیندان
خرابه نالیه گلدی اونون نواسیندن
دیردی گل آنون ئولسون گُلیم سولوبدی بالا
هایانداسان علی جان دوشلریم دولوبدی بالا
بالا قوجاقیمه گل آغلا بیر دیوم جان جان
او‌گل کیمی سارالان رنگوه آنون قربان
بیر آز قالوبدی چخا جانیم اشتیاقوندن
خرابه ده یانارام من سنون فراقوندن
ندندی گلمز اجل قورتارام من ناشاد
آنوی یاخشی ملر قویموسان ایوون آباد
گل ای قویان منی هجرینده یانه یانه بالا
خدنگ قامتیمی دوندرن کمانه بالا
بو نسگیلون آنوی یاندیرور آنون ئولسون
نه نوعی تاب ائلدون تیر جانستانه بالا
چالاندا سن ال ایاق اولمادیم یانوندا سنون
یانار یانان اورگیم آتش نهانه بالا
هامی آنا بالاسین قتلگاهیدن تاپدی
تاپانمدیم سنی باغریم دولاندی قانه بالا
علی ئوزون باباوین سینه سینده یات راحت
آنوی قویگیلا ویرانه لرده جانه بالا
بیلوبدی باب کرمسن دخیل درگاهون
گلوب امیدیله«منعم»بو آستانه بالا
- چهارشنبه
- 15
- بهمن
- 1399
- ساعت
- 21:42
- نوشته شده توسط
- یوسف اکبری
- شاعر:
-
مرحوم منعم اردبیلی
ارسال دیدگاه