ای سیـر الییـن چوللـری سـرنیـزده قارداش
بیر باخ باجیوا گور نه گزور غمزده قارداش
هـریـانه چکـور جـزبه عشقون منی قارداش
آچ گـوزلـریوی شـاد المـه دشمنـی قارداش
بیـر باخماقیـوا مَستیـدی بو غمـزده قارداش
علت اودی قالمـوش گـوزی سرنیزده قارداش
غـم تیرینی وئـردیم آلیشان سینمـه دلدیم
چولدن‌چوله‌دوشدوم باشیون آردیجا گلدیم
شهریمدن اوزوب ال سنلن من چوله دوشدوم
عشقـونده قولـوم باغلانوب الدن اله دوشدوم
سـردستـه اولـوب قیـزلارا هریانی دولاندیم
عشقـونده نقـدری منـه غـم گلـدی دایاندیم
بَلـوایه دوشـوب ، صبـر الدیم من سنه خاطر
گـوز یاشیمـی هـر گـون الدیم من سنه خاطر
دوشدوم غم و آلامه‌حسین‌جان سنه خاطر
کِشـدی بـالالاراریمـدا جـانینـان سنه خاطر
غـارتـده یانـوب هـم یارالانـدیم سنه خاطر
هـر کـوی بیـابـانـی دولانـدیـم سنه خاطر
محملـده حسین بـاشیمی یاردیم سنه خاطر
سنـده بـو اوغـولسـوزلاریـوا باخ منه خاطر
قیـزلاریوی گـوزدن نه یامان گونده آتوبسان
واضحدی حسین کولرین اوستونده یاتوبسان
بیکس باجون ئولسون بو نه حالتدی حسین جان
حلقـون باشـا باش زخم و جراحتدی حسین جان
پروانه کیمی شمعیوه من یانمـوشام ای باش
خنجـر یاراسینـان آخوریی قان گینه قارداش
قربانیـن اولوم قلبیمه محنتلی اوخون ساچ
نـاز اتمـه منـه قـانـه بـاتـان گوزلریویی آچ
ییخـدون ائـویمـی زینبـه نـاز اتمـه بـرادر
آچ گـوزلـریوی ، آغـریسـا اینجیتمـه برادر
باشـونان آخـوب گوزلـریـوه لختـه لنن قان
کیپـریکلـریویی بیـر بیـره وئرما سنه قربان
زینب نجـه ئولمـز غمینـی درک اله سـوزدن
کیپـریک آراسینـان آخوریی قان یوزه گوزدن
قـران اوخـویـان شخصـه وئـرلر بَلی پاداش
قران اوخودون باشیوه داش وئردیلا قارداش
ظلمیلـه وئـروبلار بـاشیـوا سنـگ جفـانـی
بـو ظلمیلـه آغـلادیــلا یکسـر اُسـرانـی
نیلـوم آلیشـور قلبیـم اَخـا غملـر الینـن
دلخـونم حسیـن شـامیـده مـاتملـر الینن
لیـلایـه نظـاره الـه گلمـوش نـه فغـانـه
اکبر باشینـون عشقینـه گلمـوش هَیجـانـه
اکبـردن اوتـور چولـری قول باغلی گزوبدی
قـول باغلی،اورک یاره لی،دل داغلی گزوبدی
اکبـر باشینـا باخـدیغیجـا سینه سی سوزان
سویلور بو نه حالتدی تاپوبسان بالاجان جان
باخ غملـی ربـابه دئمـه غم قلبینـی بُولمـور
بیر درده دوشوب هِش کس اونی دیندیره بولمور
هر کیـم کی اونـا سویلیـوریی آغلاما بسدی
چـوخ یورما ئوزون سینه‌لری داغلاما بسدی
ای وای صود امر اصغریم ای وای دیوب آغلور
لب تشنـه ئولـن اصغـره لایـلالی دیـوب آغلور
سسلور بالام اوخلاندی گمان لبلـری اسدی
اوچ شعبلـی اوخ حلقینـی باشـدان باشا کسدی
پیکـانه گلـوب آغـلادوب امـا شـهِ دینـی
گـریـان الیـوب سیـد بـی یـار و مُعینـی
هجـران اوخیـلان سینمی من بُولمسَم اولماز
هجـرینـده خانیمـلار قوجـالوب ئولمسَم اولماز
جان شیشه‌سی نِیلیم کی‌سینوب‌غصه داشینان
دوزدور کی منـه بـاخمیـوری نیـزه بـاشینـان
باخسا منـه گوز یاشیمی گـوزدن اَلـرم من
گـر بـاخمـاسا قلبیـم وَرَم ایلـر ئـولـرم من
میـدانه گِئـدنده قولـونی باغـلاموشـام من
شـاید بـو عملنـن اورگیـن داغـلاموشـام من
علت اودی میـدانه گئـدوب حتمـی گیلیلـی
الان منـه بـاخمـاقـه اونـون گلمـوری مِیلـی
کوسموش آناسینان ، اودی اوخ قلبیمه تاخمور
مُحکـم اَلینـی سیخمـوشـام حتمـاً منه باخمور
دائـم بالامـا یـاس تـوتـارام آغلیـارام مـن
لایـلای اوخیوب سینه‌لـری داغلـارام مـن
گونلـر قاباغینـدا اوتـوروب هی مَلـرم من
بـوش قنداغینی گـه آچـارام گـه بَلـرم من
گورسم صودامر طفلی بالام وای دییرم من
یـاده سـالارام اصغـری لایـلای دییــرم مـن
- چهارشنبه
- 22
- بهمن
- 1399
- ساعت
- 20:21
- نوشته شده توسط
- یوسف اکبری
- شاعر:
-
رامین محمد زاده
ارسال دیدگاه