سبک: آی گوزلریمون نوری...
ای میوه جان لایلای
آهوی جنان لایلای
گوهر کیمی ویرانه
منزلده نهان لایلای
لایلای یارالی طرلان
داغ داشدا گزن ویلان
لایلای قره گوز جیران
عمّون گوزوه قربان
لایلای کمگیم لایلای
سولموش چیچگیم لایلای
گوزیاشلی گیدن قبره
قاره لئچگیم لایلای
زنگ سفریم لایلای
محکم سپریم لایلای
سن یات سُؤله سون زینب
وای دربدریم لایلای
آغزیمدا دادیم لایلای
باغلی قانادیم لایلای
قالدی قره گون سنسیز
دیللرده آدیم لایلای
غنچه دوداقیم لایلای
آلما یاناقیم لایلای
زهرا ننمه بنذر
یورقون قوناقیم لایلای
داغلار لالاسی لایلای
ریحان خولاسی لایلای
گل یوزلی شیرین سوزلی
قارداش بالاسی لایلای
پوزقون تفاقیم لایلای
دوتقون شافاقیم لایلای
سن گوزدن اولان گوندن
سوندی چراغیم لایلای
شیون سالانیم لایلای
ائلدن قالانیم لایلای
دیلسیزلره شیرین دیل
لایلای چالانیم لایلای
ائللر هوسی لایلای
گوزلر گله سی لایلای
بختی کفنی قاره
زهرا نوه سی لایلای
یانسون فلکی سالدی
ایتگین سنی ئللردن
دردون یازیا گلسه
حتما کئچر ایللردن
دوشمز سنون آلامون
دنیا بوئی دیللردن
غم غصه سی تاریخه
آوازه سالان لایلای
گون باتدی گونوز گئتدی
آی چخدی بانا دوندی
سوسو وران اولدوزلار
گویلرده سانا دوندی
ئولدون بی بوون قلبی
هجرونده قانا دوندی
قبروندن ئوپر سویلر
ای جسمیمه جان لایلای
آز سنّده طوفانه
سالدی سنی غم سیلی
چوللرده اسیر اولدون
دگدی یوزوه سیلی
یاپراق کیمی سیلیدن
اولدی یایاقون نیلی
سلب ایتدی وجودوندن
ظلم اهلی توان لایلای
قالدیم الی قوینندا
سینم دولی حرماندی
دور بیر ئوپوشک باهم
خسته جگریم یاندی
نازلی باخشون دیلده
هردردیمه دررماندی
ای زینت آغوشیم
آهوی رَمان لایلای
گون باتدی آیون عکسی
چوللرده چایا دوشدی
شیرین سوزون ایولرده
اولدی هایا دوشدی
گوز دگدی گوزل آدون
دیللرده وایا دوشدی
عزتلی گونون اولدی
جبریله تالان لایلای
عادتدی گزر دائم
جیران قوشا چوللرده
قؤسون ئوزینی چرپار
داشلان داشا جوللرده
جیران کیمی تز چخدی
عمرون باشا چوللرده
داغ داشی اورک داغلی
ویلان دولانان لایلای
طوفان قوپا هر یرده
یللر سنه قان آغلار
چایلار جالانوب داشسا
سللر سنه قان آغلار
دوشسه تورا آهولر
ائللر سنه قان آغلار
دائم آدی دیللرده
محنتلی قالان لایلای
- چهارشنبه
- 22
- بهمن
- 1399
- ساعت
- 20:27
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه