یوزده زلفیم اللریم باشدا توکر قان یاش گوزوم
دیزلریم تترر دونوبدور تیره شامه گوندوزوم
قویما گوزیاشیم کیمی دوشسون یره قارداش سوزوم
قیل توجه، نطقه گل دیندیر بونالانی حسین
ای دوشن ایسّی قوم اوسته پیکر صدپاره سی
زینبون محزون قالوب، ای چاره سیزلر چاره سی
آز قالیر دیبدن توکولسون صبریمین دیواره سی
کیمسه یوخ دردین دئسون، یوخ درده درمانی حسین
دُخت زهرایم اسارت قیدینه پابسته یم
اوغلی قارداشی اؤلن بیر دستیه سر دسته یم
آند اولا اوز جانیوه جانیم عزیزی خسته یم
آز قالور پاشیده اولسون جسمیم ارکانی حسین
حشمت و جاهین تالاندی ای سلیمان زمن
تاپدی بو چولده سن ال بی مروّت اهرمن
بیر عقیق انگشتر اوسته خیردا بارماقون کسن
عالم معناده آغلاتدی سلیمانی حسین
ظلمده ظلم اهلی قارداش جای نقصان قویمویوب
هئچ قتیلی قاتلی بو نوع عریان قویمویوب
پیکرونده کهنه بیر کوینکده دونان قویمویوب
نه مروّتسیزدیلر اتباع سفیانی حسین
نعشیوی عریان قویانلار سویدی آل حیدری
نه عبا قالموش باشیندا، نه عقیق انگشتری
گون قباقینده قویور عریان بو باشسیز پیکری
من کیمی وار هانسی گلزارین نوا خوانی حسین
- دوشنبه
- 27
- بهمن
- 1399
- ساعت
- 9:41
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه