اولمادی گلسین بیری مظلوم امامین دادینه
عصر عاشورا گینه دوشدی «فقیرین» یادینه
اوندا کی قالموشدی عریان یرده صدپاره بدن
نیزه و خنجر ویرردی جسم شاهه هر گلن
سن نه حاله قالدون اوندا ای عزیز پنج تن
زینبون چکدی او چولده یدّی قارداش داغینی
اؤلدی ساعت، کسنده ساربان بارماغینی
آه او ساعتدن او چولده شعله چکدی خیمه لر
آشکار اولدی یکایک کینه ی دیرینه لر
آتش اخیامیدن یاندی مشدّد، سینه لر
گه ویروب اطفالی، گاهی خیمگاهی سویدولار
گاهی آت اویناتدولار، گه تازیانه ویردولار
آغلادی اطفال شاهین حالینه بیگانه لر
مست اولوب اما بو جور و ظلمدن دیوانه لر
بیربه بیر خاکستر اولدی فاطمی کاشانه لر
شرمیدن باتدی او آخشام گویلرون اولدوزلاری
نصف شب قالموشدی آواره حسینون قیزلاری
تار مار ایتدی شهیدان نعشینی سُمّ سمند
قاسمین جسمی آیرلاندی بدنن بندبند
ال باشیندا زینب کبریٰ چکوب آه بلند
ایلدی نفرین اورکدن او داغیلمیش کوفه نی
ناطق قرآنی اؤلدوردی، سوسوز دین دشمنی
بولمورم یارب نیه دوشدی بو سوزلر یادیمه
نصف شب روح القدوس گلدی گینه امدادیمه؟
یا چاتوب آه سحر، بو موقعده فریادیمه
گر «فقیره» بیرده قسمت اولسا خاک کربلا
تلّ زینبده یاز شعر شجاعت مطلقا
- دوشنبه
- 27
- بهمن
- 1399
- ساعت
- 19:21
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه