ای سوسوز دریا یانوندا جان وئرن مردانه قارداش
پخش اولان اعضاسی بیربیر گوشهٔ میدانه قارداش
کربلا دشتینده قارداش محشر عظما یاراتدون
بیرق اسلامی السیز قانلی میداندا اوجاتدون
بو کمکسیز پادشاهی یابن حیدر سن قوجاتدون
مرد و مردانه دایاندون ایتدیگون پیمانه قارداش
آه او ساعتدن یخیلدون،گلمه دی چاره الیمدن
دوشدی دیل آغزیمدا بنده،دوشمدی آدین دیلیمدن
باشیوی نوفل یاراندا،ویردی بیر ضربه بئلیمدن
اولمادی طاقت یخیلدوم،آنداولا قرآنه قارداش
آچ گوزون گلدیم یارالی قانلی رخسارون فداسی
باش باشا جسمین یارادی،وار گوزونده اوخ یاراسی
بیربیره دگموش او ساغ گوز نه آغی وار نه قراسی
گوزده گوزلیک قالم‌یوبدی آنداولا سبحانه قارداش
اوخ آتانلار مشکی ائتدی،نهر علقمده بهانه
باش باشا اولدی وجودین،تیر اعدایه نشانه
مشکیوه اوخ دگدی اولدی،سیل تک اشکین روانه
تاپمادین آخرده چاره زهریلی پیکانه قارداش
اونداکی آهن عمودیله باشین اولدی شکسته
دورَوی آلدی اراذل الده خنجر دسته دسته
منده گلدوم بو سینان بئلن برادر باشون اوسته
سنده دور دیندیر حسینی،گلموشم من جانه قارداش
سن قوجاتدون آی ابولفضل،ظهر عاشورا امامی
دولدوروب سوزِ عطشلر سربسر دور خیامی
گوزلوری لب تشنه قیزلار ناگران،الده سو جامی
یوخ جوابیم خیملرده اصغر عطشانه قارداش
کربلاده سیل غملر بیر به بیر باشیمدن آخدی
قیزلاریم راحت یاتاردی،چون بولوردی کیم اویاخدی
آنداولا زهرایه بو هجران منی یاندیردی یاخدی
بیر دقیقه طاقتیم یوخ محنت هجرانه قارداش
یابن زهرا ائیله چاره بو یوزی قاره «فقیره»
دورمی ایلیب احاطه معصیتهای کبیره
شعریمین اولسا ثوابی لطف ائله روحِ «حقیره»
چون اسیر خاک اولوبدی،شاعر فرزانه قارداش
- سه شنبه
- 28
- بهمن
- 1399
- ساعت
- 23:12
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه