گل اولور میدانه عازم،شاه مظلومان باجی
آز قالور چاتسون وصاله،عاشق جانان باجی
عازمم بو راهِ عشقه،باشرف همسنگریم
دوغرانوب مرآت طهٰ،اوخلانوبدور اصغریم
جان وئروب دریاده تشنه،شیردل سرلشگریم
یازدوروبلار عضو عضوه،هر بیری قرآن باجی
آغلاما،آغلاتما یول اوسته باجی قارداشیوی
گوزلریم قربان سنه توکمه بئله گوز یاشیوی
گر چه سالدی گردش دوران بلایه باشیوی
سن ولی دوز،صبریوه ایّوب اولوب حیران باجی
هندین اوغلودا منیم سالدی بلایه باشیمی
اؤلدوروب اولادیمی،انصاریمی،قارداشیمی
ریزه ریزه دوغرانام،اگمم یزیده باشیمی
ایلرم هندوغلونی حیران و سرگردان باجی
قویمارام چاتسون مرامه جانی غارتگری
ایلسین بازیچه الده،مکتب پیغمبری
آل سفیاندور او،منده حیدریم حیدری
من شهید اولسام اولارسان دینه پشتیبان باجی
گلموشم کرب معلّایه شهادت عشقینه
جان وئرم دریاده لب تشنه ولایت عشقینه
سنده گلدون کربلایه،بول اسارت عشقینه
بیز باجی قارداش جهانی ایلدوخ حیران باجی
زینبیم بو عترت اطهاری تاپشوردم سنه
نور عینیم،سیّد بیماری تاپشوردوم سنه
هم ربابی،لیلینی،قیزلاری تاپشوردوم سنه
قویما آل حیدری غارت گونی گریان باجی
عرض ائدوب گئتدی ابوالفضلیم، برادر سنده گئت
نیلَمک قالدوم حسین بی یار و یاور،سنده گئت
گئتدی آلتی قارداشیم،الله و اکبر،سنده گئت
قوی قالا کرب و بلاده زار و سرگردان باجی
هان «فقیرا» نصف شبدور سسله ماتم صاحبین
ایسته حاجت درگهیندن،دؤی درِ دم صاحبین
قبریوه یالوار گله،سقا و پرچم صاحبین
تا سنه حامی دورا،محشرده پس هرآن،،باجی
- پنج شنبه
- 30
- بهمن
- 1399
- ساعت
- 12:5
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه