صبح دم باد صبا وئردی بشارت عالمه
گلدی محبوب خدا،ختم رسالت عالمه
خلقتینده ایلدی،خالق اوگونده شاهکار
اوج خلقتده وئروبدی،اوج زینت عالمه
گلدی دنیایه انیس و محرمِ اسرار عشق
لنگر بنیان خلقت،پایه ی ایثار عشق
دهریده بی رونقیدی گرمی بازارِ عشق
عرصه ده تنها،ولی میدان دولی کفّاریدی
شهر مکه پایگاه فرقه ی اشراریدی
اوّلین ذکری دیلنده یا رحیم و یاصمد
خلقتینده یوخ شریکی،قل هو اللّهُ احد
چوخ اوزون یولدور یولی،یوخ رهنماسی،نابلد
حرف اوّل مکه ده مطلق اولوب بتخانه لر
بیرطرف بازار فحشا،بیر طرف میخانه لر
چوخ جنایاته اولوردی مرتکب اهل شرور
وحشیلر بولمور نه دی،تورات و انجیل و زبور
ایلیوردی بیحیالر،قیزلارون زنده ب گور
بسکه دنیای گناهه،اول عربلر غرقیدی
علم و دانش یا جهالت،اوللارا بی فرقیدی
صبر ائدوب قرخ ایل بو ظلمه،افتخار انبیا
چوخ مصیبت چکدی بو یولدا،امینِ کبریا
نیّتی یکتاپرستیدور،ولی قوم دغا
گاهی جادوگر دئیوب گاهی یولوندا دوردولار
گه ویروب داش اول مبارک دیشلرون سیندیردولار
عاقبت اولدی بو ظلم و جور و ایذادن رها
محضرِ یاره گلوبدور جبرئیل باوفا
عرض ائدوب حقّین سلامی وار سنه یا مصطفیٰ
مژده وئردی اول نویدی اوردا با صوت جلی
خاتمِ پیغمبران اولدون بو دمدن،، یاعلــی
باشلادی اوّلده پنهانی حنیفی مذهبی
ایلدی تبلیغ اسلام و بو عالی مکتبی
جمع ائدوب اقوامینی واضح بیوردی مطلبی
کیمدی دوتسون اللریمدن تا منه اولسون ولی
سسلدی لبیك ازلده فاتح خیبر علـــی
ایلدی اتمام حجت علمیلن میر کرام
آیریلوبدی شرعیده،حدِّ حلالیله حرام
مکه اولدی پایگاه دین و قران والسلام
سینیدلار لات و عُزالر،حق دایاندی منبره
سس گلوب احسن سمادن،خاتم پیغمبره
مشرکین ایمان گتوردی،حضرته یار اولدولار
داغ کیمی هر تک تکی یار وفادار اولدولار
کوفیان #کرب_بلاده اوغلونی تک قویدولار
اشبه طاهانی اول قوم ستمگر دوغرادی
حرمله دریاده لب تشنه بالانی اوخلادی
آه او ساعتدن یخیلدی تشنه شاه کربلا
دورینی آلدی چوخور یرده گروه اشقیا
اللرینده تیغ و نیزه،دیلده کین مرتضا
ویردی اوّل سینه ی شاهه،سنان الده سنان
نیزه نی چکجک اولوبدور قتلگه قانه روان
گوزلرون آچدی چوخور یرده شهنشاه جهان
عرض ائدوب ای خالق قادر،خدای مهربان
منکی اؤلموشدوم علی اکبر اؤلنده بی گمان
بارالهی راضیم حقین نجور فرمانی وار
اولمویا یالقیز حسینون،ایکی دم ده جانی وار
من قوتاردوم دوغراناندا ریزه ریزه اکبریم
اللریمده جان وئرنده آلتی ایلیق اصغریم
آغلوری یازجاخ «فقیر» و مادحان محضریم
کیمدی الان بو چوخور یرده دوباره جان وئرور؟
محضر جانانه لب تشنه،ئوزون قربان وئرور
- پنج شنبه
- 30
- بهمن
- 1399
- ساعت
- 22:52
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه