کربلا دشتینده یارب قتل و غارتدور بوگون
اهل بیتِ حیدره، برپا قیامتدور بوگون
یامحمد گل هرایه شهریار عالمین
اهلبیتون دوغرانوب،عرشه چیخوب آه و انین
جان وئرور گودالیده،لب تشنه دلدارین حسین
سینه سوزان مو پریشان،آل عترتدور بوگون
آغلوری یالقیز امامه،کربلانین داشلاری
ال چالور آت اوینادولار،کوفه نین اوباشلاری
بعضی میداندا ویرور نوک جدایه باشلاری
قدسیان قان آغلوری غرق مصیبتدور بوگون
وارد اولدی قتلگاهه تا سنان الده سنان
تیتردی گهواره مثلینده زمین و آسمان
نیزه نی ویردی،چکنده سَپدی او دم ایستی قان
مطلبین اوستون چوخ آجسام هتک حرمتدور بوگون
گوزلرون آچدی گینه یومدی امام انس و جان
گوردی هچ کس یوخ یانوندا،شهریار مهربان
قان دولان لبلره سویلوردی ابوالفضل هارداسان
گل منی اللردن آل وقت حمایتدور بوگون
خنجر الده مقتله قویدی ایاق شمر لعین
سوز چتین یرده دایاندی یا امیرالمومنین
وا حسینا ناله سیندن تیتردی عرش برین
یوم رستاخیزیدن گویا علامتدور بوگون
مخزن سرّ خدایه چکمه لی قویدی ایاق
آغ محاسیندن یاپوشدی،یاعلی گوزدن ایراق
بیر سکوت محضه غرق اولموشدی وادیّ عراق
آسمانلار کهکشانلار غرق محنتدور بوگون
چوندروب یالقیز امامین امرینی ایتسون تمام
آلدی بیر شیون سسین،گودالیده تخم حرام
گوردی بیر عورتدی آغلور سسلوری ایوای بالام
عرش اعظم بو جسارتدن خجالتدور بوگون
باخدی یرده پخش اولوبدی مصحفین غم نامه سی
تِرمه مثلی دوغرانوب پیغمبرین عمّامه سی
دورت مین اوخلان اوخلانوب اگنونده زیبا جامه سی
یوم عاشورادی یا یوم قیامتدور بوگون
- یکشنبه
- 3
- اسفند
- 1399
- ساعت
- 23:4
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه