او دم کی باشیوی ویردی سنان اوسته سنان قارداش
کمک سیز زینبه اولدی،بو صحراده اولان قارداش
اوشاقلاره گوره یولدا،باجون اؤلسون دینَنمه زدیم
دالونجا کوفه و شامی،پیاده دیده تر گَزدیم
قسم بو قانلی تپراقه،جگرخوار اوغلونی اَزدیم
ایوینده ایلدیم رسوا،او شیطانی اینان قارداش
ازل فکر ایلدی زینب گلوب جانه اسارتدن
اولوب خسته دوشوب دیلدن،یورولدی درد محنتدن
مچاله ایلدیم سالدوم،جگرخوار اوغلونی تختن
او مجلسده دئیوب احسن،بو عشقه دشمنان قارداش
همان مجلسده نطق ائتدوم،آتام شیر خدا مثلی
بُت جانداری سیندیردیم،خلیل با وفا مثلی
سوزومدن ویردیم آغزیندان،رشیدِ کربلا مثلی
او گیر و داریده حیران،قالوبدی شامیان قارداش
دیدیم آگاه اولون ملت،بو ناکس مستِ قدرتدی
آتاسیندان آناسیندان،رذیل و پست فطرتدی
اوزاقدی بو شرافتدن،سراپا بغض و نفرتدی
اویاتدیم خواب غفلتدن،چوخون ای مهربان قارداش
تانیدیردیم او سگبازی،دیدیم قصد جفاسیندن
گوتوردوم پرده مجلسده،اونون زانی آناسیندن
نلَر وئرمیش آلانمور بو شرفسیز،آل یاسیندن
خجالت اولدی بی شبهه،بو قومه ال چالان قارداش
دئیوم بیرده بو اثناده،غمینن کشف اولا مطلب
اوشاقلاری چوخ اینجیتدی جفای شمر لامذهب
عجبدور اؤلمه دی قالدی،بو غملرده باجون زینب
منی هرچند پوزموشدی،جفای ساربان قارداش
وجودین آت دوشونده کربلاده تار مار اولدی
ویریلدی نیزه یه باشلار،مصیبت بی شمار اولدی
یتونجه شامه یوللاردا، اوباشلار سنگسار اولدی
گیدوردی اوخ آتان قارداش،گلوردی داش ویران قارداش
اولان اولدی بو اطفاله،یزیدین دستگاهینده
گورودوم کینه و نفرت،او نامردین نگاهینده
اولوب قاضی وئروب حکمی،اوزی اوز دادگاهینده
مرکّب خون لب اولدی،قلمده خیزران قارداش
دگنده تشنه لبلردن،اوشاقلار دیده تر باخدی
ائله ویردی دوداقلاردان،دوباره تازه قان آخدی
هله بیز هئچ،یازان وقته "فقیری" یاندیروب یاخدی
کمک ائتدون دلِ شبده،یازوبدی بی گمان قارداش
- دوشنبه
- 4
- اسفند
- 1399
- ساعت
- 22:16
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه