یا امیرالمومنین ای عالمینین شهریاری
گون قباقینده قالوبدی اوغلوین پوزقون مزاری
سن امیر ِماسواسن،ائت دعا صاحب زمانی
قیل دعا غیبتدن آزاد اولسون اول شاه جنانی
ذوالفقار آلسون اله،گلسون حسینون قان آلانی
ائیله سین ائیله مرمّت،،بارگاه مجتبانی
گوزلری چیخسون منافق کسلَرین،سینسین وقاری
پرده ی غیبتدن اولمور علّتی وار اوغلون آزاد
ایندیده واردی منافق،تفرقه هی ایلیور ایجاد
وار یقینیم ذوالفقاره گوز تیکوب اول شاه خوشزاد
گر ظهوره رخصت اولسا،محو اولار اصحاب شدّاد
پرچمِ عدلی آچار بو عالمینین،چشم انتظاری
گورمه دی عالمده خوش گون،آل طاها اشقیادن
بیر به بیر اولاد یاسین،ایچدیلر جام بلادن
یاغدی باران مصیبت،اولیایه نُه سمادن
هئچ بیری مظلوم حسن تک،گئتمه دی دار فنادن
قاتلی اولدی ایونده،اوز عیال و رازداری
نصف شبله وئردی جعده،حضرته تا زهر کینی
سینه ده اودلاندی قلبی،،هم وجودِ نازنینی
نصف شب قوزاندی عرشه،فرشیدن آه و اَنینی
ظلم الیله اؤلدوروبدی،بی وفا سلطان دینی
زعفران رنگینده اولدی،زهر کیندن گلعذاری
مجتبانین نیمه ی شب،آلدی زینب تا صداسین
ال باشیندا دیده گریان،گلدی درک ایتدی اخاسین
گوردی خورشید امامت،آز قالور قیلسون وداعسین
دوغرانوب اکبادی گوردی،باغلاسین نه نوع یاراسین
سینه سوزان اگلشوبدی،ایلیوبدی آه و زاری
عرض ائدوبدی مهربان قارداش بو غمده نیلیوم من
چاره یوخدی اللریمده،ایلیورم من زار و شیون
دوغرانوب سینه نده قلبون،قان سوزور غنچه لبوندن
قوی صدا ایلوم حسینی،با خبر اولسون غمیندن
سنسن عالمده حسینون،زینبون، دار و نداری
چاتدی قارداش باشی اوسته،بی کفن مظلوم دوران
گوردی قارداشی وئرور جان،آغلادی محبوب سلطان
عرض ائدوب مظلوم عالم من سنه قربان،حسن جان
آغلاما قارداش دانیشما،دولدوروبدی آغزیوی قان
نیلیوم دنیاده سنسیز،ای حسینون اقتداری
باخدی مظلوم دو عالم،شهریارِ کربلایه
قول بویون اولدی حسیندن،سویلدی گلمه نوایه
باشیون وار چوخ بلاسی،صبر ائله درد و بلایه
باشیوی دالدان کَسللر،بیر نفر گلمز هرایه
جان وئررسن تشنه لب سن،آغلاما عمریم بهاری
- دوشنبه
- 4
- اسفند
- 1399
- ساعت
- 22:25
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه