جان اوسته‌یم اوغلوم یتیر امداده رضا جان
تک قویما آماندور منی گل داده،رضا جان
گل وادیِ بغداده سنه چوخلی سوزوم وار
غمدن اَریدیم،ماتم و اندوهه دوزوم وار
الطاف خداوند تبارک ده، گوزوم وار
بیر حاله سالوب سندِ دنی یالقیز امامی
ناقص قالوری حول عباتده قیامی
بیر یرده اسیرم که نه وار آب و هواسی
ویرماقدان آغیردی منه چوخ جور و جفاسی
ائیله قَردوب پیکریمی قمچی یاراسی
احوالیمه بوینومداکی زنجیرلر آغلار
شرمنده‌دی مندن نچه ایللردی ایاقلار
غربتده غریب اؤلسه مگر، آغلویان اولماز؟
بیر سیّدِ پیره اورکی داغلویان اولماز
سن گلمه‌سن اوغلوم گوزومی باغلویان اولماز
گَل بیرده گوروم گول یوزوی سید رضوان
صون لحظه‌ده جانانه ویریم جانیمی آسان
عرش اهلینی ائتدیم بو غمه واله و مجذوب
حیران قالوب الله بولوری صبریمه ایوب
دوران دولانوب یوسفی گوزلور گینه یعقوب
یوسف‌ده گلوب سن کیمی شیرین دهن اولماز
سن گلمه‌سن اوغلوم آتاوی دفن ائدن اولماز
ایللر بویی اولدوم دل غمخانه‌ده محبوس
عمرومدن ال اوزدوم یاشاماخدان داخی مایوس
من کُنده و زنجیریله اولدوم بالا مانوس
صبریم داشوب آخر بو قدَر قمچی یمه‌کدن
اللهدان اؤلوم ایستمیشم ایندی اورکدن
غربتده اوگون یومدی گوزون موسی جعفر
قان آغلادی احوالینه زهرا و پیمبر
بغداده گلوب بزم عزا قوردی ملک لر
زنیدانیده سس دوشدی اؤلوب شاه خوش انفعال
گول نعشینی یردن گوتوروب دورت نفر حمّال
هر نحویله دفن اولدی اوگون سرور خوبان
بیر شاعر شیعی اوخدی حضرته قرآن
اوچ گجّه ولی قالدی حسین پیکری،عریان
اولدی کفنی خنجر و سرنیزه و پیکان
مقتلده داغیتدی سینه‌سین سمّ ستوران
ویردی او قَدَر یاره او شاهنشه اعدا
نه حاله قالوب یوخدی یازام شرحینه یارا
آواره او گودالی گزوب زینب کبری
گوردی توکولور سرعتیله مقتله لشگر
بعضی گوتوروب داش الینه بعضیسی خنجر
گوردی یخیلیب قتلگهه نور دو عینی
سالموش آرایا دشمن او شاهِ حرمینی
گودالیده داشلوردی هامی،یالقیز حسینی
بیرکسلیقی اوردا ایلدی قلبیدن احساس
قانلی لبیله سسلدی گل هارداسان عباس
- دوشنبه
- 4
- اسفند
- 1399
- ساعت
- 22:51
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه