یابن الحسن ، ای شه کون و مکان
دالدالانوب سایووه هفت آسمان
گون سنه خاطر یئره نورین سالور
آی دا که سندن آقا فرمان آلور
لطفووه وابسته دی هفت آسمان
سنله قالیب زنده زمین و زمان
حق سنه وئرمیش نئجه گور اختیار
گوزلرووه باغلیدی لیل و نهار
بیر باخیشون یئر گویه فرمان وئرور
مهر و مهه رخصت جولان وئرور
گورست آقا جلوهٔ پیغمبری
مشتریدور گوزلرووه مشتری
عطرون آقا گللری سرمست ائدور
عشقووه بلبللری پا بست ائدور
خاک رهون سرمه دی حورا لره
هر نفسون جاندی مسیحا لره
سن دانیشاندا یئره مرجان یاغور
نور یاغور ، آیهٔ قرآن یاغور
ماه رخون ایله عیان ای زعیــم
طوریده لبیک دئسون تا کلیم
قامتووی ایله نمایان آقا
تا سنه عیسی ائلسون اقتدا
یوسف اگر گورسه خَد و خالووی
عالمی حیران ائدن اجلالووی
جلوه رخسارووی گورسه اگر
بارماقینی شوقیدن حتما کسر
شعره سیغیشمور حسناتون سنون
شعره ییغیشمور وجناتون سنون
من هارا ، مدحون هارا یابن الحسن
چوخدی اوره کده یارا یابن الحسن
قوی آقا بیر آز الیوم درد دل
عفو ائله مولا ، خجلم من ، خجل
بیر نظر ائت گردش دورانه باخ
ظلم الیوب عالمی ویرانه باخ
ظلم و ستم سایه سالیب عالمه
ظلم اولونور خیل بنی آدمه
واردی سوزوم عفو ائله یابن الحسن
چوخدی اوره کده گله یابن الحسن
حق دانیشان دیللر آقا لال اولوب
خون شهیدان نئجه پامال اولوب
ظلم و ستم رونق بازار اولوب
ملته ابلیس جلودار اولوب
ترسه اولوب مملکتون هر ایشی
عورته بنذور قویوب آدین کیشی
رخت زنانه گیوری قاش آلور
معرکهٔ فسقیده شاباش آلور
بعضی زنان مذهبی ایلوب خراب
باطل اولوبدور آقا حکم حجاب
ائوده محبت ائلمور محرمه
زینت ائدور صورتی نامحرمه
بعضیده اولموش اوقدر ناسپاس
اللهی گورمور ، الیور اختلاس
حقینی پامال الیور ملتین
مال حرامه ساتور حیثیتین
نقل محافلدی یالان ، سیدی
غیبت ائدورخلق عیان ، سیدی
فسق و فجوریله بو دنیا دولوب
ایندی ربا ، خلقه مربا اولوب
مصحف قرآنه باخان یوخ آقا
آیهٔ رحمانه باخان یوخ آقا
سینه لری گرچه محن داغلیوب
مذهبی بو هیئتیلر ساخلیوب
هیئتیلر اُسوهٔ غیرتدیلر
تابع فرمان ولایتدیلر
هیئتی غوغاده ایتیرمز ئوزین
هیئتی نامحرمه تیکمز گوزین
هیئتی عاقل اولار ، هذیان دئمز
هیئتی هر لقمه نی والله یئمز
هیئتی هریئرده ریادن قاچار
هیئتی واللهی ربادن قاچار
هیئتی اولماز ابداً ناسپاس
هیئتی الحق ، ائلمز اختلاس
هیئتی یا شاعر و یا نوحه خوان
سینه ویران ، شوره گلن ، آغلیان
نوحه دین نوحه دئمز پاکته
ساتماز حسینون آدینی ثروته
سینه ویران شهرتی باشدان آتار
باشدان آتار شهرتی ، عرشه چاتار
دادلیدی قوی منده دیوم بو سوزی
کیم گوره بیلمور بیزی چیخسون گوزی
هیئتی ام ، هیئتی ام هیئتی
واردی وجودیمده علی غیرتی
هیئتی ام خاک ره حیدرم
عالمه من بیر توکونی وئرمرم
- شنبه
- 9
- اسفند
- 1399
- ساعت
- 10:39
- نوشته شده توسط
- یوسف اکبری
- شاعر:
-
محمدرضا محمدی (ناعم)
ارسال دیدگاه