صفای باطن آختارسان دولان ایمان اولان یئرده
دیانت بللی دیرمعیار اولارقرآن اولان یئرده
رضای خالیقی هرکیم نظرده آلسا هرایش ده
پشیمان اولمازاوحتی اونا خسران اولان یئرده
ادب دیر اؤلچؤسی ممتازائدن انسانی انسان دان
شرافتله یاشارانسان اؤزی اینسان اولان یئرده
اوانسانه مرید اول کی دؤزر یؤز محنته اما
زره زوره باشین ایمز شرف میزان اولان یئرده
اگرمال ومنالین وار اونودما یوخسولون حالین
دعالر بی ثمرقالماز،گولوم،احسان اولان یئرده
همیشه جهدائله دوستون الیندن دوت یامان گؤن ده
ولیکن امتحان ایله اونو امکان اولان یئرده
هوای نفسه هرکیم غالب اولسا اهل تقوادیر
آماندیرچاشمایول دان معصیت آسان اولان یئرده
بوفانی دهریده بئل باغلاماهرآلچاق انسانه
یقین بیل کی یئخاربیرگون سنی بحران اولان یئرده
شعوره باغلی دیرآنجاق حیا تین اصل معناسی
اینان کی دیغلارانسان همدمی نادان اولان یئرده
عبث فیکرایله مه عالم لرین هچ یوخدی گمراهی
روایت لردن آل بومطلبی برهان اولان یئرده
یولون آزمیش مسلمانلار حسینه اولدولار،یاغی،
شریح قاضی صاحب منصب دیوان اولان یئرده
هدف ذکرمصیبت دن رسالت حکمی دیرذاکر
قیام کربلا اهدافین آچ بهتان اولان یئرده
عزاسینداحسینه آغلاماق عین عبادت دیر
کلیدباغ جنت دیربیزه نیران اولان یئرده
یاراندی کربلاده مین بلاچون آل طاهایه
امامت حیله وتزویریله کتمان اولان یئرده
رذالت قومی صف چکدی حقیقت روبروسوندا
یزیدرذل امیرالمؤمنین عنوان اولان یئرده
قیزیل قانیله عاشوراگؤنی ثبت اولدی تاریخه
قلم شمشیر دفترجان مرکب قان اولان یئرده
کسیلدی بیربه بیریئتمیش ایکی باش تشنه صحراده
قیزیل قانه بویاندی جسمیلرالوان اولان یئرده
دیلیم عاجزدی شرحیندن نه نوعی ایله ئیم عنوان
سوسوزجان وئردیلرنهرفرات آلقان اولان یئرده
فراتین آدی ذهنیمده ابوالفضلی سالیریاده
ائدم تشریح آلامین اونون عدوان اولان یئرده
یاریب قلب سپاهی یول آچیب فتح ایله ئیب نهری
سومشگین دولدوروب بیرفرصت شایان اولان یئرده
کیم اولسیدی ایچردی مختصرآب گواردن
اولارفع عطش بلکه اونا امکان اولان یئرده
ایکی اوجون سودان دول دوردی او سقای لب تشنه
ولیکن ناروابیلدی ایچه عطشان اولان یئرده
دئدی آیانئجه سیراب اولوم اهل حرم قالسین
عطشدن خیمه لرده آهیله افغان اولان یئرده
قونوتون آچدی سوآخدی یئره عزم خیام ائتدی
فتوت حکمونه رفع عطش آسان اولان یئرده
آلیب اطرافینی لشکریاغیب هرسمتیدن اوخلار
سپاه دشمنه فرمان تیراعلان اولان یئرده
ازلده اوخلانیب مشگی اولوب مأیوس اونام آور
سوآخدی مشگیدن امیدائوی ویران اولان یئرده
تیکیلدی جسمینه مشگی اولوب آماج تیرازبس
گؤزی یولدا قالان گؤزلر اونا گریان اولان یئرده
چکیلدی مسلخ عشقه اوسردارین سرانجامی
اوزون قول لاری حق اثباتینا تاوان اولان یئرده
اوقدری ووردولاریاره چیخیب شکل وشمایل دن
آشیب حددن شقاوت کینه دن عصیان اولان یئرده
چاتیب مقصوده چون سیراب اولوب شهدشهادتدن
قالیب اهل حرم گریان اؤرکلرقان اولان یئرده
حسینین کؤرپه سربازی ال اؤسته گلدی میدانه
عطشدن کام آلا اؤچ شعبه لی پیکان اولان یئرده
سپاه دشمنه بیرآیری حالت اؤز وئریب گویا
ائدیب تأثیرچون بعضیلره وجدان اولان یئرده
وئریب فرمان تیری ناگهان فرمانده لشکر
زهین چکدی کمانین حرمله پنهان اولان یئرده
مجسم ایله ئین اؤچ شعبه اوخ بیر کؤرپه یه نیلر
خصوصأ اوخ بوغازیندن ده یه عطشان اولان یئرده
الهی بیلمیرم آیااو گؤل دن بیر اثر قالدی
ویاسوورولدی گؤل تک گؤل بوغاز شان،شان اولان یئرده
- شنبه
- 9
- اسفند
- 1399
- ساعت
- 10:54
- نوشته شده توسط
- یوسف اکبری
ارسال دیدگاه