مرغ دل آوازه گلوب مرحبا
شوقیله پروازه گلوب مرحبا
باده ویرور ساقی بزم الست
شرب طهوراسی ایدوب خلقی مست
فوج ملایک هاموسی پرزنان
خنده کنان،غرق شعف نغمه خوان
دسته به دسته هاموسی یکسره
گویدن انوللر طربیلن یره
یدی سمانی بوریوب صوت حور
یاغدیرورالله یره باران نور
جنت الاعلی بزنوب نوریله
حضرت داوداوخیور شوریله
سبقت آلور آسیه ده هاجره
فاطمیه مژده ی بهجت ویره
جامه ی شادی گیینوب ماه شب
مهرجهانتابی مه ایلور طلب
کثرتیلن قافله ی حوریان
یثربه ساری شعفیلن روان
بیت حسینه ییغیشوب بیقرار
حلقه ویروب هاموسی پروانه وار
نغمه ی غرا هاموسی سر ویروب
الله حسینه علی اکبر ویروب
لطف الیوب حی تبارک حسین
مقدم شهزاده مبارک حسین
آلدی قوجاقه شه دین اکبری
دولدی سرشکیله گوزل گوزلری
شکرالدی خالق دارافره
اکبری اکبر یارادان اکبره
عرض ایدوب ای خالق ارض وسما
گوهرپرقیمتووه مرحبا
بذل ایلیوبسن منه بو گوهری
فوج ملک گوزلرینه مشتری
قاشلاری شمشیرشررباریدی
زندگیمون مطلع الانواریدی
سن یارادیبسان دل دریاسی وار
جدیمه بنذور رخ زیباسی وار
قربان اولدم آیدان ایشیق طلعته
یوسف رعنانی سالار حیرته
کیم گوره فکر ایلمز اکبردی بو
فکرالیر شخص پیمبردی بو
خلقا"و خلقا"خود احمددی بو
کیم دیور اکبردی، محمددی بو
من که سنون امرووه فرمانبرم
درگهووه شام و سحر شاکرم
گچدی غرض سرعتیلن ماه و سال
رشدالیوب اکبر احمدخصال
اولموشودی سویملی بیرنوجوان
انی کوره ک قاشلاری عینا"کمان
بیرگونی گوردی اونی مروان پست
مکتب شیطانه اولان پای بست
باخدی سوروشدی دنن آدون ندی
مقصدو مقصود و مرادون ندی
شبه پیمبربیله ویردی جواب
آدیم علیدور، نوه ی بوتراب
هانسی علیسن دیدی ای محترم
قیلدی بیان من علی اکبرم
فاتح بدریله حنین اوغلیام
نجل نبی، یعنی حسین اوغلیام
نام علیدن اوجالوبدورباشیم
واردی علی آدلی گوزل قارداشیم
منده علیم نوه ی حیدرم
قارداشیم اوسط، ولی من اکبرم
بوسوزی مروانی سالوب حیرته
خشمه گلوب، باخدی او مه طلعته
غیضه گتوردون منی ای مه جبین
نام علیده نه گوروبدی حسین
هرنه اوغول حق اوناایلور عطا
آدلارینی علی قویور گوییا
گلدی دیله اکبرنیکوسیر
لعل شکرباری داغیتدی شکر
دیدی آتام سرور آزادگان
بوسوزی کراتیله ایلوب بیان
هامی گرکدور ایده باورمنه
گریوزاوغولدا ویره داورمنه
عشق علی جامه سینی سویمارام
غیرازعلی نام دگر قویمارام
اوچ علیه روشن اولوب گوزلریم
اکبر و اوسط ،گله جک اصغریم
هراوچونی حق منه ایلوب عطا
واردی قاباقدا هله بیرکربلا
ای قلمیم گچمه گریزه دایان
شام ولادتده، نه آه و فغان؟
ایتدی عطاحق بوگجه اکبری
خلقا"و خلقا"خود پیغمبری
لبلری نور الثقلینون گولور
یعنی دوداقلاری حسینون گولور
شعرووه"ناعم"داخی ویر خاتمه
مزدووی حتما"ویره جک فاطمه
- یکشنبه
- 10
- اسفند
- 1399
- ساعت
- 22:57
- نوشته شده توسط
- یوسف اکبری
- شاعر:
-
محمدرضا محمدی (ناعم)
ارسال دیدگاه