یاران قورولوب بزم عزا عرش خداده
آثار محن ظاهر اولوب ارض و سماده
مهدی آقامیز آغلیور ئوز جدی جواده
بوغمده گرک سینه سینی داغلیا شیعه
قاره گیینه،باشه ویروب،آغلیاشیعه
ذی القعدآیینون آخری بیز قاره گیینوک
گوزیاشی توکوب گرد غم و یاسه بورونوک
قسمت اولا گر قبری,یوزی اوسته سورونوک
بو غمده یانان سینه ی پر سوز رضادی
بو غمکدیه بانی غریب الغربادی
ای شیعه ی اثنا عشر ای ملت ایران
همت الیون حفظ اولونا عترت و قرآن
نعمتدی بیزیم مملکته شاه خراسان
بوگونده ولی قلبینی غم تیری بولوبدی
گوزیاشی توکون شاهیمیزون اوغلی ئولوبدی
هرکس که اولوبدور غمی دنیاده زیاده
اولسون متوسل بو گجه باب مراده
ویرسون قسم اول پادشهی اوغلی جواده
صدق دلیله کیم اولا بو بزمیده حاضر
البته وئرر حاجتینی اوغلونا خاطر
من بنده ی شرمنده ی خلاق جلیلم
بوشدور بو الیم سائلم و ابن سبیلم
بودرگهه بیرعمریدی منتله دخیلم
نه شاعرم و نوحه گر ونوحه سرایم
من عاشق شوریده سر ابن رضایم
گر حضرت جانان منه لطف ایلیه رخصت
مدحین یازارام دفتره در حد بضاعت
وار معتبر اخباریده مشهور روایت
من نظمه چکوم حظ ائده عشاق حسینی
ایلوبدی روایت بو سوزی شیخ کلینی
اولاد نبی عالم عالمدی مسلم
هر تک تکی اولموش بلی سر اللهه محرم
یحیادی دیوربوخبری زاده ی اکثم
بیرگون من ئوزوم,زائریدیم قبر رسوله
مشغول طوافیدیم ئوزوم قبر رسوله
ناگاه گوزوم گوردی او دم ابن رضانی
مشغول طوافیدی او مصداق معانی
حیران ائلمیشدی حرکاتی عرفانی
من ماتیدیم اوشهده اولان عزت وجاهه
گیتدیم قاباقا عرض سلام ائتدیم او شاهه
چوخ رٲفتیله رد سلام ائتدی اومولا
عرض ایلدیم ای نابغه ی حکمت وتقوا
سندن نچه مطلب سوروشوم اینجیمه اصلا
باخدی منه حکمتله او والای خدابین
من یاخشی بیلوردوم اوسوالات جوابین
القصه نچه مساله من ایلدیم عنوان
فی الفور جوابین بویوروب قویمادی نقصان
گوردوم ئوزومی مور او مولانی سلیمان
عرض ائتدیم آقا سنده اولان حکمته احسن
سن تک آقا, عالم بجرن نهضته احسن
ای معدن لطف وکرم و علم وفضیلت
فخر ایلیه جک سن کیمی مولایه شریعت
وارآیری سوالیم منه مانعدی خجالت
بو مساله ده ماتم و حیرانم ئوزومده
واللهی غرض یوخدی منیم صونکی سوزومده
لبخند ویروب ائتدی بیان اول شه حق بین
ای عالم گم کرده ره مذهب و آیین
ویرم دیمه میش مساله نین فوری جوابین
قویما اوره گونده قا لاچوخ درد و ملالون
یحیی بیلورم شرح امامتدی سوالون
حیرتده قالیب عرض ائلدیم ای شه خوبان
اللهه قسم حق و حقیقت بویورورسان
کیمدور دئ گوروم ایندی بیزه حجت دوران
حضرت بویوروب من نبوی خوی و مرامم
من حجت دورانم امام بن امامم
عرض ایلدیم ای سرور احرار زمانه
گورست منه بو مطلبه بیرعمده نشانه
ناگاه عصاسی آقانین گلدی بیانه
بومنظره واللهی منی حیرته سالدی
حیران ائلیوب قلبیدن آرامیمی آلدی
بو واقعه دن مطلبیم آخر اله گلدی
ظلمت قوتاریب مژده ی رحمت دله گلدی
موسای زمانین اوز عصاسی دیله گلدی
سس گلدی عصادن بوآقا شاه جهاندی
حجتدی بو دورانه شه عصر و زماندی
بیر شاه که ایلردی ملائک اونا خدمت
افسوس اونون قدرینی هچ بیلمدی امت
ئوز همسری ایلوبدی او مولایه خیانت
مسموم ائلدی زهر جفائیله جوادی
قان آغلا که قالدی آتاسیزحضرت هادی
زهریله الولاندی وجودی او امامین
جنتده آچوب باش باباسی حضرت یاسین
عرش اهلی ائدوب نوحه اولوب فاطمه غمگین
ئوز عورتینه ائتدی خطاب اول نبوی خو
آخر نفسیمدورئولورم وئر بیر ایچیم سو
بیر لحظه بلادن بیلوسن اولمادیم ایمن
آخر نفسیمدور یانورام سوز عطشدن
چوخ ناله ائدوب ابن رضا دوشدی نفسدن
سوگتدی کنیزون بیری فع عطش اتسون
مانع اولوب اول کینه روش قویمادی گتسون
گلزار بتوله گینه باد غم اسیلدی
بو غمده یانارشیعه اگرناب و اصیلدی
ناگاه جوادون سسی بالمره کسیلدی
آچدی قاپونی عورت بیرحم و جفاکار
گوردی که یوموب گوزلرینی سرور احرار
گوردی که دوشوب پیکری یوز اوسته ترابه
بو عورت بی عاطفه لایقدی عذابه
مینلر بئله عورت اولا قربان او ربابه
اصغر آناسی همسریدی شاه زمانه
درس شرف و عشق ویروب خیل زنانه
یول سالدی اوگون قافله که وادی شامه
گوز آلتی باخوردی او خانیم رأس امامه
از بس اوتانوردی دیلی دونموردی کلامه
ظاهرده چوخ آغلوردی دیوردی بالام ایوای
خلوتده ائدوب نوحه دیوردی آقام ایوای
ای سرورعطشان سر و پیکرسنه قربان
نوزادی ئولن من کیمی مادرسنه قربان
ای روح بقا صود امراصغر سنه قربان
من هئچ دئمورم همسرووم یا که عزیرم
فخریم بودی درگاهووه منتله کنیزم
شادی جهان سنسیزحسین اولسون حرامیم
سنسن شرفیم,صاحبیم,اربابیم,امامیم
زینبدی منیم دهریده الگوی مرامیم
سندنصورا عمروم کچه جک غم سیاقیندا
عهدیم بودی سن تک من ئولم گون قاباقیندا
قورتارسوزی باخ ساعته شب نیمه دی(ناعم)
بو شعریله عقباده یقین بیمه دی(ناعم)
دلبسته نه جاه و حشم و سیمه دی(ناعم)
بو شعره برات ایستوری سلطان سخادن
بیرکرب وبلا اخذ ائلیه ابن رضادن
- چهارشنبه
- 13
- اسفند
- 1399
- ساعت
- 22:57
- نوشته شده توسط
- یوسف اکبری
- شاعر:
-
محمدرضا محمدی (ناعم)
ارسال دیدگاه