دوشنده یادیمه شخصیّت امام جواد
چکر یانان جگریم اُمّ فضل اَلیندن داد
اولار که شیعه ی اثنی عشردی شهرتی وار
ائمّیه اولارین عشقی وار، ارادتی وار
مدام ایده لّه توسّل بو اون ایکی نوره
دیمز بو آدلاری هر کیمسده دلده ظلمتی وار
اولوب ائمّه اوز عصرینده تک به تک مظلوم
هامی سنین دله تاثیر ایدن کدورتی وار
بو سهلیدور که اولوب آل مصطفی مقهور
اُلونجه شیعه لرین سینه ده جراحتی وار
اولونمیوب اولارا لامَحاله بیر مجمع
بیری بیریله قبورین اوزاق مسافتی وار
بیری نجفده یاتوب باشدا وار قلج یاراسی
اودور سبب نجفین عرشه اشرفیّتی وار
اونون ولایتیدور روح مذهب و ایمان
اونیله نعمت اسلامین اکملیّتی وار
یاتوب بقیعیده دوردی، بیری خراساندا
بیر آتا بیر بالا سامرّه ده اقامتی وار
بیرین فرات کنارینده کربلاده سوسوز
شهید ایدوبله، اونون بیر اوزون حکایتی وار
بیرینی گوشه ی زنداندا حبس ایدوب هارون
بیر عمر کُنده و زنجیریله رفاقتی وار
باخور اورک گوزی بغداده، دل گَلور داده
او شهریده بیر امامین جوار رحمتی وار
آدی امام محمّد تقی، آتاسی رضا
هامی غمه اوزینون صبری وار، رضایتی وار
جواد دور لقبی، منبع سخاوت دور
خدا بُلور نجه بیر جوری وار، سخاوتی وار
ایگیرمی بِش ایل ایدوب عمر او سرور مظلوم
جوان اَلوبدی، آز عمرینده چوخ مصیبتی وار
اگر گوزوم یاشی قویسا گرک یازام باشدان
بیان ایدم نه قَدَر قصّه ی شهادتی وار
او گون که ایلدی یحیی بن اَکثَمی مغلوب
مُبرهَن اولدی نه اندازه اعلمیّتی وار
امام قتلینه اقدام ایدوب او بی ایمان
گَتوردی ظاهره هر مکره ماهریّتی وار
سِعایت ایلدی مامون یانیندا بیر نچه یول
دیدی بونون سنه چوخ رخنه ی ریاستی وار
دیولّه خلق بودور حجّت خدا خَلقه
بو حقّی غصب ایده مامون مگر لیاقتی وار؟
بو بیر طرفدن، اویانداندا گَلدی اُمُّ الفضل
یتوردی محضر مامونه هر سِعایتی وار
دیدی بابا منی ویردون بو هاشمی نسبه
بونون سنیله بُلورسن اوزون عداوتی وار
مدام او بیرسی عیالین منه ویرور ترجیح
دیور بونون سنه بی منتها فضیلتی وار
علاوه سَبّ ایدوری هم سنی هم آتاوی
دیور نه قدر مزخرف کلامه فرصتی وار
بو سوزلری ایشیدن وقت مستیدی مامون
اودور که مُذمِن خَمرین مدام عقوبتی وار
اَیاقه غیظیله دوردی او بی حیا فوراً
دیدی تقی منی سَبّ ایلسون نه قدرتی وار
چاقوردی بیر نچه بی رحم محرم اسرار
دیدی سیزون بُلورم قلبیزون قساوتی وار
گَلون منیله نه حکم ایتسم ایلیون اجرا
بو امره ایلسه هر کیمسه سبقت عزّتی وار
خلیفه حاجِبی یاسردی راوی مطلب
دیر خلیفه نی گوردوم کمال وحشتی وار
تمات غیظیله شمشیرین ایلیوب عریان
امام منزلینی قصد ایدوبدی سرعتی وار
گَلوب نه گوردی یاتوب حجره ده امام جواد
همان او حجره ده سجّاده ی عبادتی وار
ایدوب عبادت اولوب خسته، یوخلیوب راحت
بیر آز زمان بیله معلوم خواب راحتی وار
جمالی مَضجَعینی(خوابگاه) گون کیمی منوّر ایدوب
ایشیقلانور دیه سن آفتاب طلعتی وار
یوزین دوتوب دیدی محرملرینه اول بی دین
بونون منه بُلوسوز متّصل خیانتی وار
چَکون قلجلاروزی دوغریون بو گُل بدنی
دایانماقین بیله بیر وقتیده نه علّتی وار
چَکوب قلجلاری بی رحم لر غلافیندن
یوزینده باخمادیلار نور حقّ علامتی وار
امامی دوغرادیلار قطعه قطعه، بند به بند
امامه باخ نجه اعجازی وار، کرامتی وار
آچلدی صبح گَلوب هوشه بی حیا مامون
ز بسکه مستیدی بُلموردی نه جنایتی وار
گَلوب حضوره یاسر دیدی گئچن گئجه نین
خلیفه هیچ بُلوسن نه بیوک سیاستی وار؟
گئجه تقیّ جوادی یتورموسن قتله
جزاده سندن اونون جدّینه شکایتی وار
ایشیتدی بو سوزی مامون پوزولدی احوالی
دیدی بو سوز ندور؟ عرض ایتدی عین صحّتی وار
جواب ویردی دایانما، خبر گَتور فوراً
حیات مژده سی هر کیم ویره بشارتی وار
گَلوبدی یاسر امام جواد محضرینه
گوروب گَلور سسی، خوش لحنیله قرائتی وار
نماز صبحی قیلوب باشلیوبدی تعقیبات
خدای لَم یَزَل و لا شَریکه طاعتی وار
ویروب سلام دیدی سیّدی سنه قربان
خلیفه نین سنه بی منتها مودّتی وار
حضوریزه منی گوندردی حالیزی سوروشام
وجودیزون ایشیدوب مختصر نقاهتی وار
آچوبدی نطق گهربارینی بویوردی امام
خلیفه نین عملیندن یقین ندامتی وار
گئجه گَلوب منی تیغیله بند بند ایلدی
او امره ایمدی پشیمان اولوب، نه حکمتی وار؟
دعای حفظ اوخوموشدوم یاتاندا من یاسر
همان دعاده خدا حفظی وار، حراستی وار
دیوب بو سوزلری پیراهنین کنار ایلدی
بویوردی باخ گور او ضربتلرین سرایتی وار؟
باخاندا گوردوم امامین وجودی سالمدور
قلج نشانه سی یوخ، گُل کیمی لطافتی وار
کمال وجدیله گَلدیم حضور مامونه
دیدیم خلیفه امامین عجب جلالتی وار
نه دوغرانوبدی، نه جسمینده بیر قلج یری وار
نه انکسار مزاجی، نه ضعف حالتی وار
ایشیتدی بو سوزی شاد اولدی، سویلدی بُلدوم
شراب اُمّ خبائثدی، جرم و حرمتی وار
شراب ایچن اوزی اوز عقلینی ایدر زائل
محمّد عربینون گوزل شریعتی وار
او گونکه گوندن او ملعون شرابی ترک ایلدی
دیدی بو جرم دگل، کفریله شراکتی وار
قیزین چاقوردی، دانیشدیردی، ایلدی تهدید
دیدی سنه آتاوون عمده بیر وصیّتی وار
گَلوب دیه سن منه بیر سوز تقیّ هادیدن
یقینون اولسون او دم نفسیوون هلاکتی وار
سِعایت ایتمدی اوندان صورا او ملعونه
اورکده ساخلادی هر کینه و خصومتی وار
او ساعت اولدی که مامون جحیمه واصل اولوب
یرین گویون اونا تا روز حشر لعنتی وار
ایدوبدی غصب خلافت برادر مامون
او ظالمین دیمه ماون کیمی شقاوتی وار
آدی صحیفه ی تاریخه معتصم یازیلوب
جفا و جوریده مامونیدن زیادتی وار
او بی حیا اوزینه اُمّ فضلی راغب ایدوب
امام قتلینه بُلدی اونون غریمتی وار
امام قتلینه مامور ایتدی محرمینی
دله موثّر اولان قصّه ی شهادتی وار
دیسم نه نوعیله مسموم اولوب دلیم یانسون
کیمون ایشیتماقا بو ماجرانی طاقتی وار
یازوب صریح مناقبده ابن شهر آشوب
اونون بو مطلبه بیر معتبر روایتی وار
اورکده قبره آپارّام آناسنا دیرم
علوم صاحبینون هاردا بیر روایتی وار
بو قدر عرض ایده بُلّم که زهرلی دسمال
اولا وفاتینه علّت، خدا مشیّتی وار
یازار ولیک بو طرزیله مجلسی مرحوم
اونون روایتینون عیبی یوخدی، نسبتی وار
امامه ویردیله مسموم رازقی انگور
امام گوردی وجودینده زهر شدّتی وار
اَلی اورکده ایدوب راست قبلیه قدّین
دیدی یانور جگریم، قلبیمون حرارتی وار
من ایمدی که اُلورم بیر ایچیم گَلون سو ویرون
سو ویرماقین سوسوزا حق یانندا اجرتی وار
بابام دیوب سو ویرون جان ویرنده مُحتَضِره
شراره ی عطشین میّته صعوبتی وار
بیری کنیزلریندن سو دولدوروب بیر جام
که ظاهر ایتسون امام زمانه خدمتی وار
کنیزین آلدی اَلیندن او جامی اُمُّ الفضل
کیمون جهاندا بیله بیر وفاسیز عورتی وار؟
چالوب یره دیدی سو ویرمیون سوسوز اُلسون
حسینه بو سوسوز اُلماقلیقون اشارتی وار
گَلوب امام علیّ النّقی گوروب آتاسین
گوگلده سوز عطش، گوزده اشک حسرتی وار
دیدی بابا گوزون آچ سو گَتورموشم سنه من
سو ایستمه، گوروسن دشمنین شمادتی وار
آلوب ایچوب سویی، سیراب اولدی، جان ویردی
حسینه ایمدی ده امّا عطش اذیّتی وار
اُلنده چوخ سو دیدی کربلا غریبی حسین
سوسوز کَسیلدی باشی، تشنه کام شهرتی وار
جواد رخلت ایدوب، معتصم اولوب مسبوق(پیشی گرفته)
دیدی منیم بو گون اقبالیمون سعادتی وار
جنازه سین چخادون بامه، قویمیون اولا دفن
گوره محبّلری جسمینون حقارتی وار
دَگَر گون ایستیسی بد بو ایدر جنازه سینی
قاچار خلایق اگر گورسه لر عفونتی وار
چخاتدیلار او مبارک جنازه نی بامه
امامه معتصمین گور نجه اهانتی وار
قویوبلا گون قاباقیندا جنازه سین اوچ گون
بو غمده شاه شهیدانه تابعیّتی وار
دگنده گون بدنیندن گَلوردی عطر عبیر
اونون یانیندا عبیرین نه قدر و قیمتی وار
دگوب نسیم صبا عطری شهری دولدوردی
هامی دیدی بو ائیون مشکیدن مزیّتی وار
بو ماجرادن اولوب معتصم ز بس رسوا
گَتوردی ظاهرده گیزلینده هر خباثتی وار
اوتانمادی او زنا زاده، ویردی بیر فرمان
دلیم بیان ایده مضمون حکمی لکنتی وار
ووروب سالوبلا یره بامیدن جنازه سینی
عزیز فاطمه نین گور نه قَدر ذلّتی وار
سالور قضیّه ی بغداد کوفه نی یاده
بونون مصیبتینون مسلمه شباهتی وار
- چهارشنبه
- 13
- اسفند
- 1399
- ساعت
- 23:0
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه